Abaı oblysynda dala órtine baılanysty tutas bir aýyldy kóshirýge týra keldi
ASTANA. KAZINFORM – Abaı oblysynda Prırechnoe aýylynda kúnbaǵys qabyǵynan shyqqan órt jekemenshik sektorǵa jaıylǵan.
Oblystyq Tótenshe jaǵdaılar departamenti habarlaǵandaı, qoıý tútin men ekpindi jel saldarynan sharýashylyq qurylystary men turǵyn úıdiń shatyry órtendi.
- Jel sekýndyna 25 metrge deıin kúsheıip, bólimshelerdiń jumysyn qıyndatqan. Úıler bútin qalǵanymen, keı jaǵdaıda órt qosalqy qurylystarǵa jaıylǵan. Tútinniń kesirinen kórý múmkindigi óte shekteýli, - dep habarlady oblystyq Tótenshe jaǵdaılar departamenti basshysynyń birinshi orynbasary Danııar Álimkın.
Oqıǵa ornynda 100-den astam adam men 33 tehnıka, sonyń ishinde avıatsııa jumys istep jatyr. Qutqarýshylardyń málimetinshe, sýdy aǵyzatyn qurylǵysy bar TJM tikushaǵy jumyldyrylǵan.
Turǵyndar tútin aımaǵynan evakýatsııalanyp jatyr. Jergilikti turǵyn Dınara Chıngılbaevanyń aıtýynsha, jalyn onyń úıin zaqymdaǵan.
- Bári tez boldy. Aýladaǵy tútindi kórip, órtenip jatqanyn túsindim. Balalar úıde boldy. Biz eń qajetti zattardy ǵana alyp úlgergen kúıimizde júgirip shyqtyq. Úı, monsha, as úı bári órtenip ketti, - dep baıandady ol.
Eske sala ketsek, Abaı oblysyndaǵy órtke baılanysty jedel shtab quryldy.
Keltirilgen shyǵynnyń naqty somasy órt tolyǵymen sóngennen keıin belgili bolady. QR Tótenshe jaǵdaılar mınıstrliginiń Basqarý ortalyǵynda jedel shtab óz jumysyn jalǵastyryp jatyr. Azamattardyń habarlasýy úshin senim telefony ashyldy: 8 (722) 35-38-36.