Abaı atyndaǵy opera jáne balet teatry gastrolmen elordaǵa kele jatyr
NUR-SULTAN. QazAqparat - Abaı atyndaǵy Qazaq memlekettik akademııalyq opera jáne balet teatrynyń 85 jyldyǵyna oraı mekeme ujymynyń Nur-Sultan qalasyna gastroldik sapary ótedi, dep habarlaıdy QazAqparat.
Teatrdyń baspasóz qyzmetinen málim etkendeı, mereıtoılyq gastrol elordada 5,6,7 jáne 8 shilde kúnderi «Astana Opera» Memlekettik opera jáne balet teatrynda ótedi.
«Abaı atyndaǵy Qazaq memlekettik akademııalyq opera jáne balet teatry - qazaq halqynyń rýhanı sımvoly bolyp tabylady. Onyń tarıhy ulttyq opera jáne balet óneriniń qalyptasýymen, damýymen jáne órkendeýimen tyǵyz baılanysty. Teatr sahnasynda 300-den astam týyndy qoıylǵan. Olar - tuńǵysh qazaq operalary men baletteri, orys, batys eýropa opera klassıkasynyń jaýharlary», - dedi teatrdan.
Gastrol baǵdarlamasynda trýppa repertýarynyń altyn qoryn quraıtyn jáne kórermenderdiń turaqty qyzyǵýshylyǵy men súıispenshiligine ıe bolǵan qoıylymdar bar.
«P.I. Chaıkovskııdiń mýzykasyna qoıylǵan Borıs Eıfmannyń «Anna Karenına» atty spektaklindegi Qazaqstan Respýblıkasynyń eńbek sińirgen qaıratkeri, Abaı atyndaǵy QMAOBT prımasy Sáýle Rahmedovanyń benefısi kórermender úshin naǵyz syı bolmaq. Keshterdi P. Maskanııdiń «Selskaıa chest» jáne R. Leonkovallonyń «Paıatsy» atty XIX ǵasyrdyń sońynda kompozıtorlardyń baıqaýǵa arnap jazǵan bir bólimdi operalary ashady. Qos opera da tańǵaldyrarlyq jetistikke jetken, ókinishke oraı, bul avtorlardyń ómirindegi jalǵyz-aq jetistigi edi. Otbasylyq tamashalaý úshin komedııalyq spektaklder - Dj. Rossınıdiń «Kúlbıke» operasy jáne L. Mınkýstyń «Don Kıhot» baleti qyzyqty bolady», - delingen habarlamada.
Gastrolder QR Mádenıet jáne sport mınıstrliginiń qoldaýymen, «Rýhanı jańǵyrý» memlekettik baǵdarlamasyn júzege asyrý aıasynda ótkizilip otyr.
