Abaı atyndaǵy MAOBT elorda kórermenderine «Qyzyl Jızel» baletin usynady - «Astana Opera»
ASTANA. QazAqparat - «Astana Opera» 21 qyrkúıekte gastrolmen keletin Abaı atyndaǵy MAOBT qarsy alady. Áıgili óner ordasy elorda kórermenderine kórnekti peterborlyq horeograf Borıs Eıfmannyń «Qyzyl Jızel» baletin usynady, dep habarlady «Astana Opera» teatrynyń baspasóz qyzmetinen.
Borıs Eıfmannyń tereń sezimge bólep, ózine tánti etpeıtin spektakli joq desek, artyq aıtqandyq bolmas. Solardyń biri «Qyzyl Jızel» baleti. Atalǵan balettiń sıýjeti 1923 jyly Reseıden qashyp, biraz ýaqyt boıy Parıjdegi Grand Opera sahnasynda bıimen jarqyrap, keıin esinen adasýynyń saldarynan uzaq jyldaryn Amerıkanyń psıhıatrııalyq emhanasynda ótkizgen orystyń uly balerınasy Olga Spesıvtsevanyń tragedııasyn baıandaıdy. Ol 1991 jyly qarttar úıinde kóz jumdy.
Balet tilimen jetkiziletin bıshi ómiriniń tarıhy shynymen de júrekti qozǵaıdy. Spektaklde revolıýtsııa kezindegi Petrograd kartınasy men sahnasynda Balerına bılegen altyndaı jarqyldaǵan kórermen zalynyń kartınasy qatar júredi. Názik balet perızaty ózine yntyq bolǵan Chekıstiń qursaýyna eriksiz iligip, kóp uzamaı ol bıshiniń ómirin oıran etedi. Jazyqsyz jan týra spektakl kezinde esinen adasyp, aınalasyna ony mazaq etken qorqynyshty adamdar qaptaıdy. Ol emhanaǵa túskende de sol azaptan arylmaıdy: qoldy mataǵan jeıde keıipkerdiń sanasynda qyzyl týǵa aınalady. Qutylýdyń bar amaly esinen adasý bop kóringen Balerınanyń jany máńgige qamalyp, «aınanyń arǵy jaǵyndaǵy» jalt-jult etken álemge kete barady.
Horeografııasy erekshe mánerli, rejısserdiń sheksiz qııaly, sahnalyq shyǵarylymy da tamasha spektakl qoıylǵan saıyn tabynýshylar qataryn kóbeıtýde.
Balerınanyń basty partııasynda – Aınur Ábilǵazına, Azamat Asqarov Chekıstiń partııasyn oryndaıdy, Nurlan Baıbosynov Muǵalimdi bılese, Farhat Býrıev – Seriktes, Dostyń rolin oınaıtyn Rýslan Qadirov.
Qoıýshy baletmeısteri – Borıs Eıfman, Reseıdiń Halyq ártisi, Memlekettik syılyqtar ıegeri (Sankt-Peterbor), mýzykasy – P. Chaıkovskıı, A. Shnıtke, J. Bıze, qoıýshy sýretshisi – Martıns Vılkarsıs (Rıga), kostıým jónindegi sýretshisi – Vıacheslav Okýnev, Reseıdiń halyq sýretshisi, Memlekettik syılyqtar ıegeri (Sankt-Peterbor), baletmeıster assıstentteri – Alına Solonskaıa, Sergeı Zımın (Sankt-Peterbor) , balettik trýppanyń jetekshisi – Gúljan Tutqybaeva, QR Halyq ártisi.
Eki aktiden turatyn balet 19 : 00 bastalady.
