Abaı atyndaǵy QazUPÝ-da Qazaqstan halqy Assambleıasynyń kafedrasy ashyldy
Qazaqstan halqy Assambleıasy kafedralar qaýymdastyǵynyń prezıdenti Anatolıı Bashmakovtyń aıtýynsha, bul jer etnosaıasatqa qatysty ǵylymı áleýmettik zertteýler alańyna aınalmaq.
«Bul jerdi stýdent jastarmen úzdiksiz jumys jasaıtyn Assambleıanyń kishi fılıaly desek bolady. Saraptamalyq jumystardy júrgizý jáne bilim berý maqsatynda ashylyp otyr. Men Assambleıanyń ózin Qazaqstanda ómir súrip jatqan túrli etnostyń patrıottyq tárbıesin jolǵa qoıatyn mektep dep bilemin»,- dedi Anatolıı Bashmakov.
Dóńgelek ústelde sóz alǵan ýnıversıtet rektory Takır Balyqbaev, bul qadamnyń qanshalyqty mańyzdy ekenin atap ótti.
«Bizdiń oqý ornynda 35-ten astam etnos ókilderi bilim alady. Shyǵys tilderi kafedrasy bar. 2011 jyldan bastap túrli ult jastarynyń basyn qosatyn stýdentter assambleıasy jumys istep keledi. Oǵan qosa biz Qazaqstannyń bolshaq ustazdaryn daıyndap otyrǵan soń, olardy tárbıeleýdegi ınternatsıonalızm rýhy óte qajet. Bul qasıet osy mamandar arqyly keleshekte elimizdiń barlyq aımaqtaryna beriledi».
Qazaqstan halqy Assambleıasy Tóraǵasynyń orynbasary - Hatshylyq meńgerýshisi Leonıd Prolokopenkonyń aıtýynsha, búginde Qazaqstandaǵy kafedra qaýymdastyǵy quramynda 35 kafedra, 1 qoǵamdyq keńes, 1 ınstıtýt, 3 ortalyq, beıbitshilik pen kelisimdi nasıhattaıtyn 42-ge jýyq joǵaryy oqý orny bar.
Araılym Joldasbaı
