Abaı atyndaǵy teatr 93-maýsymyn «Aqbala» baletiniń premerasymen ashty
ASTANA. KAZINFORM — Abaı atyndaǵy Qazaq ulttyq opera jáne balet teatry 93-maýsymyn Ábdijámil Nurpeıisovtiń «Qan men ter» trılogııasynyń jelisimen qoıylǵan «Aqbala» ulttyq baletiniń premerasymen ashty. Bul týraly Mádenıet jáne aqparat mınıstrligi habarlady.
Qazaq ádebıetiniń klassıgi Ábdijámil Nurpeıisovtiń áıgili týyndysy alǵash ret baletke arqaý bolyp, teatr sahnasynda jańa qyrynan kórinis tapty. Qoıylymǵa teatrdyń balet trýppasy, sımfonııalyq orkestri, opera solısteri men hory qatysty. Qylqobyzdyń qońyr úni qoıylymnyń mýzykalyq mazmunyn tereńdete túsedi.
Basty partııalardy Aqbala rólinde Mılana Rahımbekova, Elaman rólinde Arhat Áshirbek, Táńirbergen rólinde Rústem Imanǵalıev oryndady. Baletti Qazaqstan, Germanııa, Italııa jáne Reseıden kelgen mamandardan quralǵan halyqaralyq shyǵarmashylyq top sahnalady.
Qoıylym sanaly ǵumyryn Abaı atyndaǵy teatrmen baılanystyryp, otandyq balet óneriniń damýyna eleýli úles qosqan belgili óner maıtalmandary Lıýdmıla Rýdakova men Edýard Málbekov rýhyna arnaldy.
Jańa maýsymnyń ashylýyna oraı teatr tarıhy men ulttyq ónerdiń kórnekti tulǵalary týraly syr shertetin jańartylǵan ınteraktıvti mýzeı de tanystyryldy. Ekspozıtsııada Kúlásh Baıseıitova, Qurmanbek Jandarbekov, Shara Jıenqulova, Ahmet Jubanov, Dáýren Ábirov jáne basqa da óner qaıratkerlerine qatysty materıaldar qoıylǵan.
Mýzeı qory qazaqstandyq teatr-sýretshiler mektebiniń negizin qalaýshylardyń biri Vladımır Kolodenkonyń sırek týyndysymen de tolyqty. Balerına beınelengen kartına teatrǵa syıǵa tartyldy.
Aıta keteıik, Nartaı Bekejanov atyndaǵy Qyzylorda oblystyq qazaq akademııalyq mýzykalyq drama teatry 72-shi teatr maýsymyn saltanatty túrde ashty.
Al «Astana Opera» XIV teatr maýsymyn áıgili «Abaı» operasymen ashty.
