Abaı atyndaǵy kitaphananyń jobasy AQSh elshileri qory baǵdarlamasynyń jeńimpazy atandy
ASTANA. KAZINFORM — Abaı atyndaǵy oblystyq ámbebap kitaphananyń sırek qoryn saqtaý, qalpyna keltirý jáne tsıfrlandyrýǵa baǵyttalǵan jobasy Mádenı murany saqtaýǵa arnalǵan AQSh elshileri qory (Ambassadors Fund for Cultural Preservation – AFCP) baǵdarlamasynyń jeńimpazy boldy.
Mádenıet jáne aqparat mınıstrliginiń baspasóz qyzmetiniń málimetinshe, joba sırek qoljazbalar men kóne basylymdardy, sonyń ishinde Abaı Qunanbaıulynyń ómiri men shyǵarmashylyq murasyna qatysty qundy derekterdi jáne aqynnyń ózi paıdalanǵan kitaptardy saqtaýǵa baǵyttalǵan. Bul jumystyń mańyzyn kitaphana tarıhyndaǵy qundy derekter de aıqyndaı túsedi.
1885 jyly Semeıde bolǵan amerıkalyq zertteýshi, jazýshy ári jýrnalıst Djordj Kennan kitaphanaǵa kelip, Abaı paıdalanǵan kitap qorymen tanysqan. Keıin óz eńbekterinde qazaq oıshyly týraly jazyp, onyń esimin aǵylshyn tildi oqyrmanǵa alǵashqylardyń biri bolyp tanystyrdy.
— Aldaǵy ýaqytta sırek qoljazbalar men basylymdardy qalpyna keltirý jáne tsıfrlandyrý jumystary júrgiziledi. Zamanaýı tehnologııalar qundy muralardy uzaq merzimge saqtap, olardy ǵylymı-zertteý, bilim berý jáne aǵartýshylyq maqsatta keńinen paıdalanýǵa múmkindik beredi, — delingen mınıstrlik habarlamasynda.
Budan buryn elimizde biryńǵaı ulttyq elektrondy kitaphana qurylatynyn jazǵanbyz.
