Abaı atyndaǵy QazUPÝ oqý korpýstary men stadıonyn qaıtaryp aldy

ASTANA. KAZINFORM — Almaty prokýratýrasy Abaı atyndaǵy QazUPÝ ulttyq ýnıversıtetine oqý korpýstary men stadıonyn qaıtardy.

Medeý aýdanynyń prokýratýrasy «Abaı atyndaǵy Qazaq ulttyq pedagogıkalyq ýnıversıtetiniń» múlkin zańsyz satý faktilerin anyqtady.

— Oqý jáne turǵyn úı alańynyń jetispeýshiligine qaramastan, ýnıversıtettiń burynǵy basshylyǵy saýda-sattyqty ótkizbeı jáne baǵalaýsyz jalpy aýdany 1500 sharshy metrden astam eki oqý korpýsyn jeke tulǵalarǵa zańsyz satqan. Biraq ta ǵımarattardyń biri keıinnen birneshe jyl boıy ýnıversıtettiń ózine jalǵa berilse, al ekinshisinde oıyn-saýyq mekemesi uıymdastyrylǵan, — delingen vedomstvo taratqan aqparatta.

Sonymen qatar sportty birlesip damytamyz degen kóz-boıaýshylyqpen Gorkıı atyndaǵy Ortalyq mádenıet jáne demalys saıabaǵynda ornalasqan alańy 5 gektardan asatyn sport stadıony 10 jylǵa úshinshi tulǵalarǵa berilgen.

— 5 jyl boıy fýtbol alańy kommertsııalyq maqsatta paıdalanǵan, al 16 myń stýdenttiń dene shynyqtyrýmen tolyq aınalysýǵa jáne sporttyq is-sharalar ótkizýge múmkindigi bolmaǵan. Medeý aýdany prokýratýrasynyń qadaǵalaý aktileri boıynsha zańdy kúshine engen sot sheshimderimen, múlik obektileri ulttyq ýnıversıtetke qaıtaryldy, — dep atap ótti qalalyq prokýratýra.

Osyǵan deıin habarlanǵandaı, BQO-da prokýratýranyń aralasýymen 468,5 mln teńge memleketke qaıtaryldy.