Abaı atyndaǵy Qazaq ulttyq opera jáne balet teatryna jańa basshy keldi
ALMATY. KAZINFORM – QR Mádenıet jáne aqparat mınıstri Aıda Ǵalymqyzy Balaevanyń buıryǵymen Abaı atyndaǵy Qazaq ulttyq opera jáne balet teatry dırektorynyń mindetin atqarýshy laýazymyna Aınur Saılaýbaıqyzy Kópbasarova taǵaıyndaldy.
Teatrdyń baspasóz qyzmeti jańa basshyny teatr ujymyna Mádenıet jáne aqparat vıtse-mınıstri Erbol Áliqulov tanystyrǵanyn habarlady. Quttyqtaý sóz alǵandar qatarynda opera trýppasynyń kórkemdik jetekshisi Bolat Bókenov ujym atynan Aınur Saılaýbaıqyzyna óziniń tilegin bildire kele, aldaǵy isine sáttilik tiledi.
Aıta keteıik, Aınur Saılaýbaıqyzy Kópbasarova - 1975 jyly 7 aqpanda dúnıege kelgen.
1990-1995 jyldary Jambyl pedagogıkalyq ınstıtýtynda (Taraz qalasy) fılologııa mamandyǵy boıynsha bilim alǵan. 1995-1996 jyldary Ál-Farabı atyndaǵy Qazaq ulttyq ýnıversıtetinde (Almaty qalasy) magıstratýrany; 1996-1999 jyldary Ál-Farabı atyndaǵy Qazaq ulttyq ýnıversıtetinde aspırantýrany bitirgen.
2010-2021 jyldary «Idea Fabric» JShS-da bas prodıýser bolǵan. 2022 jyly tamyz aıynan bastap «Túrkistan mýzykalyq drama teatry» MKQK kórkemdik jetekshi, 2021-2022 jyldary «Túrkistan mýzykalyq drama teatry» MKQK dırektor, kórkemdik jetekshi boldy.
«Qurmet» ordeni, «Qazaqstan Təýelsizdigine 30 jyl» tósbelgisi, «QR mədenıet salasynyń úzdigi» medali, «Qurmet» gramotasy, QR Prezıdentiniń Alǵys hatymen marapattalǵan.
