Abaı ánderiniń jınaǵy aǵylshyn tilinde jaryq kórdi

LONDON. QazAqparat – Londonda Abaı ánderiniń tuńǵysh jınaǵynyń onlaın-tusaýkeseri ótti. Kitapty uly qazaq aqyny jáne fılosofynyń 175 jyldyǵyna oraı Ulttyq aýdarma bıýrosynyń qoldaýymen Qazaqstannyń Ulybrıtanııadaǵy elshiligi basyp shyǵarǵan. Joba avtorlary ádebı shyǵarmashylyqpen qatar, baı mýzykalyq mura qaldyrǵan Abaıdy búkil álemge jańa qyrynan tanytý ıdeıasyn ustanǵan.

«Abaıdyń poezııasy, fılosofııalyq jáne mádenı eńbekteri halyqaralyq deńgeıde tanymal. Biraq onyń mýzykalyq murasy týraly biri bilse, biri bile bermeıdi. Sondyqtan osyndaı kitap shyǵarýǵa bekindik. Іshinde Abaıdyń eń tanymal ánderi jınaqtalǵan. Basylymnyń basty ereksheligi onyń QR-kodtary bar. Solar arqyly bizdiń sheteldik dostarymyz veb-saıttarǵa siltemeler taýyp, qazaq mýzykanttarynyń oryndaýyndaǵy Abaı ánderin tyńdaı alatyn bolady», - dedi kitaptyń tusaýkeserinde Qazaqstannyń Ulybrıtanııadaǵy elshisi Erlan Ydyrysov.

Saltanatty sharaǵa oraı Abaı ánderinen quralǵan onlaın-kontsert ótti. Bastapqyda uıymdastyrýshylar is-sharany kontserttik zalda ótkizýdi josparlaǵan bolatyn. Osylaısha brıtanııalyq kórermenge qazaq mýzykasynyń sulýlyǵyn tanytýdy maqsat etken. Biraq pandemııa aıaqqa tusaý boldy.

Jańa brıtanııalyq pop-sensatsııa, ánshi ári avtor Smaılı (Smilee) «Kózimniń qarasy» ánin aǵylshyn tilinde oryndap, tyńdarmandy tań-tamasha etti. Nıýkasl qalasynan kelgen jas ánshi, aqyn jáne kompozıtor Annabel Pattınson bolsa, «Jelsiz túnde jaryq aı» ánin Shekspır tilinde naqyshyna keltirip shyrqady. Qazaqstandyq óner qaıratkerleri jáne jas oryndaýshylar Aıman Musaqojaeva, Erlan Rysqalı, Erjan Maksım jáne basqalary sımfonııalyq orkestrdiń, dombyranyń jáne fortepııanonyń súıemeldeýimen júrek terber Abaıdyń ánderinen shashý shashty.

Shyǵarmalardy aǵylshyn tilinde jan bitirýge áıgili shotland aqyny, professor Djon Bernsaıd atsalysty. Ol ádebı aýdarmalary arqyly túpnusqaǵa barynsha jaqyn bolýǵa tyrysty. Qazaqstandyq tarap Bernsaıdty sózbe-sóz tárjimamen qamtamasyz etip otyrdy. «Óte qıyn boldy. Biraq talap údesinen shyǵýǵa tyrystyq. Óıtkeni bul jobaǵa óz basym qatty qyzyqtym. Abaı óleńderiniń rıtmıkasyn joǵaltpaı, dálme-dál aýdarý basty talap boldy. Sonymen qatar uıqas jaǵyn da umytpaý kerek boldy. Mundaı óleńder aýdarylǵanda, ádette, bul strategııa qoldanylmaıdy», dedi Djon Bernsaıd.

Jınaqtyń ishinde 3 kúı jáne 23 án bar. Sonymen qatar Abaı ánderiniń mátinderi men partıtýralary qosa tirkelgen. Alǵashqy tırajy - 1500 dana, biraq ony ınternetten de tabýǵa bolady. Kitap mýzykalyq bilim berý oryndary men Qazaqstannyń Ulybrıtanııadaǵy dostary arasynda taratylmaq.