Abaı, Ahmet, Álıhan: Semeıdegi mektepterge tanymal tulǵalardyń esimi beriledi
SEMEI. QazAqparat - Semeıde aǵymdaǵy jyly qalanyń oqý oryndaryna kórnekti tulǵalardyń esimin berý boıynsha jumystar júrgizildi. Komıssııa sheshimi boıynsha 6 mekteptiń ataýy aýysatyn boldy. Bul týraly QazAqparat Semeı aqparattyq ortalyǵyna silteme jasap habarlaıdy.
Atap aıtqanda № 49 orta mektepke - Abaı, №37 gımnazııaǵa - Ybyraı Altynsarın, № 3 orta mektepke - Muhtar Áýezov, № 2 orta mektepke - Qanysh Sátpaev, № 39 orta mektepke - Álıhan Bókeıhan, № 47 orta mektepke - Ahmet Baıtursynov, Balalar mýzyka mektebine Temirjan Bazarbaevtyń aty beriledi. Sonymen qatar, kóshe ataýlary da qazaqshalanyp jatyr.
Buǵan deıin Dalnıaıa kóshesine Keńes Odaǵynyń Batyry Zakarııa Belibaevtyń esimi berilip, Internatsıonalnaıa kóshesi Qaıym Muhamedhanov atyna aýysqan bolatyn. 2018 jyly respýblıkalyq onomastıkalyq komıssııa otyrysynda taǵy 7 kósheni qazaqtyń aqyn-jazýshylarynyń esimine aýystyrý týraly usynys oń sheshimin tapqan.
«Sońǵy úsh jylda onomastıka salasynda atqarylǵan jatqan jumystar jeterlik. 2018 jylǵy 25 mamyrdaǵy Respýblıkalyq onomastıkalyq komıssııanyń otyrysynda Polkovnıchıı aralyn Beıbitshilik aralyna, Lenın kóshesin Máńgilik el kóshesi dep ózgertý týraly sheshim qabyldandy. Sondaı-aq balalar men jasóspirimder sport mektebine Jaqsylyq Úshkempirovtiń esimin berý máselesi de maquldandy», - dedi qalalyq mádenıet jáne tilderdi damytý bóliminiń sektor meńgerýshisi Marjan Bahytova.
Kóshe ataýlary Halyqqa qyzmet kórsetý ortalyǵy arqyly avtomatty túrde aýysatyn bolady. Turǵyndar eshqandaı aqshalaı shyǵynǵa ushyramaıdy.
