Abaıǵa 180 jyl: Mereıtoı aıasynda 100-den astam aýqymdy is-shara ótedi
SEMEI. KAZINFORM — Abaı Qunanbaıulynyń 180 jyldyq mereıtoıyna arnalǵan halyqaralyq, respýblıkalyq jáne óńirlik deńgeıdegi 100-den astam aýqymdy is-sharany qamtıtyn keshendi jospar bekitildi. Bul týraly Abaı oblysynyń ÓKQ alańynda ótken brıfıngte oblystyq mádenıet, tilderdi damytý jáne arhıv isi basqarmasynyń basshysy Janjigit Omarhan málimdedi.
Basqarma basshysynyń aıtýynsha, aýqymdy baǵdarlama 1 tamyz kúni «ABAY ACADEMIYASY» entsıklopedııalyq portalynyń tanystyrylymymen bastalady. Bul tsıfrlyq platforma aqyn murasyn júıeleý jáne ǵylymı ortaǵa qoljetimdi etýge baǵyttalǵan. Sol kúni Maqanshy aýylyndaǵy Alakól jaǵasynda Qazaqstannyń halyq ártisi Seken Turysbekov pen «Aq jaýyn» orkestriniń kontserti ótse, Semeı qalasyndaǵy Arbat alańynda ıllıýstrator Ańsaǵan Mustafanyń kórmesi ashylyp, «Asyl mura» oblystyq qolóner festıvali uıymdastyrylady.
1-6 tamyz aralyǵynda Abaı shyǵarmashylyǵyna arnalǵan kontsertter, kórmeler men teatrlandyrylǵan qoıylymdar ótkiziledi. Qazaqstannyń halyq ártisi Maıra Ilıasovanyń gastroldik kontserti Semeıden bastalyp, Úrjar, Aıagóz, Jarma jáne Jańasemeı aýdandarynda jalǵasady.
3 tamyzda Abaı teatrynda «Abaı álemi» rýhanı keshi, 4 tamyzda Seken Turysbekov pen «Aq jaýyn» orkestriniń qorytyndy kontserti ótedi. 5 tamyzda «Oı tolǵaý – Hákim Abaı» monooperasy sahnalansa, 6 tamyzda Abaı alańynda «Abaı eli – óner kenishi» atty kontsert jáne Álıhan Bókeıhan atyndaǵy ýnıversıtette «Óleń sózdiń patshasy» jas aqyndar músháırasy ótpek.
7-9 tamyz aralyǵynda ǵylymı-tanymdyq jáne ádebı-mádenı baǵyttaǵy is-sharalar uıymdastyrylady. Atap aıtqanda, 7 tamyzda jazýshy Asqar Altaıdyń shyǵarmashylyq keshi ótedi, onda «Abaı joly» entsıklopedııasy men Baǵashar Tursynbaıdyń «Abaı Qunanbaıuly kim?» kitabynyń tusaýkeseri josparlanǵan. 8 tamyzda Semeıde «Adamzattyń Abaıy» respýblıkalyq aqyndar aıtysy men Abaı aýdanynda «Jeti qazyna» ulttyq baıqaýynyń ashylýy ótedi. 9 tamyzda Shákárim ýnıversıtetinde halyqaralyq ǵylymı konferentsııa, «Jıdebaı–Bórili» mýzeıinde kórme, Abaı kitaphanasynda kitaptar toptamasynyń tusaýkeseri jáne 15 eldiń qatysýymen halyqaralyq aqyndar festıvali uıymdastyrylady. Sol kúni keshkisin ortalyq alańda «Abaıǵa tartý» atty kontsert ótedi.
10 tamyz — Abaı kúni. Bul kúni Jıdebaıda Quran baǵyshtalyp, qurbandyq shalý rásimi ótedi.
Sondaı-aq elimizdiń barlyq óńirinde Abaı eskertkishine gúl qoıý rásimderi uıymdastyrylady.
Aıta keteıik, mereıtoıǵa oraı Mańǵystaý oblysy Semeıge Dostyq úıin salyp bermek.