Abaı - 175: Lıtvada toǵyzqumalaqtan týrnır ótti
Bul týraly QazAqparat tilshisine toǵyzqumalaqtan QR bas jattyqtyrýshysy Serik Aqtaev málim etti.
Atalǵan sharany Lıtvadaǵy Qazaqstannyń elshiligi, «Jara» baspa úıi jáne Dúnıejúzilik toǵyzqumalaq federatsııasy birigip uıymdastyrdy.
Abaıdyń 175 jyldyǵyn merekeleý aıasynda qazaqtyń ulttyq zııatkerlik oıyny toǵyzqumalaqtan ekinshi halyqaralyq týrnır ótti.
Jarysqa qatysqan 22 sportshynyń arasynda vılnıýstik gımnazııa oqýshylary jáne mektep ustazdary, logıkalyq oıynnyń áýesqoılary bar.
Eresekter arasynda birinshi oryndy toǵyzqumalaqtan álem chempıony, qazaqstandyq S. Saparbekova jeńip aldy. Balalar arasynda birinshi oryn Vılnıýs gımnazııasynyń oqýshysy D. Ganchevıchıýsqa buıyrdy.
Qazaqstan Respýblıkasynyń Lıtvadaǵy tótenshe jáne ókiletti elshisi V. Temirbaev jarystyń qatysýshylary men qonaqtaryna qazaq halqy jazba ádebıetiniń negizin qalaýshy, oıshyl ári fılosof Abaıdyń aǵartýshylyq eńbekteriniń erekshe róli jóninde áńgimelep, aqynnyń súıikti oıyndarynyń biri - toǵyzqumalaq bolǵanyn málimdedi.
Qazaqstandyq dıplomat Abaıdyń ataqty lıtva jazýshysy Adam Mıtskevıchtiń óleńderin qazaq tiline aýdarǵan shyǵystyń alǵashqy aqyny ekenin atap ótti.
Jarys aıasynda bas jattyqtyrýshy Serik Aqtaev Vılnıýs pen Kaýnas qalasynyń mektep oqýshylaryna sheberlik sabaǵyn ótkizip, oıynnyń strategııasy men ádisterin aıtyp berdi.
«Lıtvadaǵy áriptestermen aldaǵy ýaqytta toǵyzqumalaqtan jergilikti federatsııa qurý týraly ýaǵdalastyq», - deıdi toǵyzqumalaqtan QR bas jattyqtyrýshysy.
Eske sala ketsek, ótken jylǵy qarasha aıynda elshilik, federatsııa jáne «Jara» baspa úıi birigip lıtva tilinde toǵyzqumalaq oıynynyń ádistemelik nusqasyn baspadan shyǵardy.
Sonymen birge, ótken jyldyń sońynda toǵyzqumalaq oıyn taqtasy Lıtvaǵa jetkizilip, áýesqoı oıynshylarǵa Vılnıýstiń tarıhı ortalyǵynda ornalasqan baspa úıiniń dúkeninde oıyn taqtasyn satyp alý múmkindigi paıda boldy.
