Abattandyrý jumystarynyń sapaly júrgizilýine jaýapkershilik júktelmek
ASTANA. KAZINFORM – Úkimet basshysy Oljas Bektenov el aýmaǵyn abattandyrý jáne kógaldandyrý boıynsha ákimdikter men mınıstrlikterge birqatar tapsyrma berdi.
«Óńir ákimderi jol kartalarynyń tolyq jáne sapaly oryndalýyn qamtamasyz etsin. Qalalardyń ómir súrýge qolaıly ári jaıly bolýy mańyzdy. Sondyqtan, ákimdikter jol kartalarymen shektelip qalmaı, týyndaǵan problemalardy shuǵyl sheship, halyqtyń pikirine qulaq asqany jón. Ekinshiden, qalalardaǵy jasyl jelekti kóbeıtý kerek. Otyrǵyzylatyn kóshetterdiń barynsha jersinip ketýin jáne olarǵa naqty kútimdi qamtamasyz etý qajet», - dedi Oljas Bektenov Úkimet otyrysynda.
Úkimet basshysy ákimdikterden bólek, birneshe mınıstrlikke tapsyrma berdi.
«Ónerkásip jáne qurylys, Ekologııa jáne tabıǵı resýrstar jáne Qarjy mınıstrlikteri aýmaqtardy kógaldandyrý boıynsha jumystar men kórsetiletin qyzmetterdi memlekettik satyp alýdyń ashyqtyǵyn qamtamasyz etýge arnalǵan zańnamalyq túzetýler ázirlesin. Úshinshiden, Ónerkásip jáne qurylys mınıstrligi óńirlerdiń jol kartalarynyń ýaqtyly jáne sapaly iske asyrylýyna tıisti baqylaýdy qamtamasyz etsin», - degen mindet qoıdy O. Bektenov.
Sondaı-aq, Premer-Mınıstr abattandyrý jumystarynyń sapaly jáne ýaqtyly oryndalýy úshin laýazymdy tulǵalardyń jaýapkershiligin bekitý jóninde usynystar engizýdi tapsyrdy.
