A.Balaeva: «Qazaqfılm» ulttyq kınony qoldaý ortalyǵynyń qarajatyna qol jaımaıtyn bolady

ASTANA. KAZINFORM – Mádenıet jáne aqparat mınıstri Aıda Balaeva «Kazahstanskaıa pravda» gazetine bergen suhbatynda «Qazaqfılmniń» bolashaǵy týraly pikir bildirdi.

- Ókinishke qaraı, «Qazaqfılm» kınostýdııasy memleketten tikeleı qarjy almaıtyndyqtan, qazirgi jaǵdaıy jaqsy dep aıtýǵa kelmeı tur. «Qazaqfılmniń» basshylyǵy Prezıdentpen kezdeskende birqatar problemany aıtqan bolatyn. Memleket basshysy sol problemalarǵa baılanysty naqty tapsyrmalar berdi. Osydan keıin oıyn erejesi ózgerdi deýge bolady – kıno ıdeologııaǵa jumys isteý kerek, - deıdi A.Balaeva.

Mınıstr Ulttyq kınony qoldaý memlekettik ortalyǵy bóletin qarajatqa «Qazaqfılm» qol jaımaıtyndaı jaǵdaı jasaý josparda bar ekenin aıtady. «Qazaqfılm» jekemenshik stýdııalardyń qazanyna ortaqtaspaý úshin memlekettik tapsyrys aıasynda ǵana jumys isteıtin bolady. 

- «Qazaqfılm» kınostýdııasyn qoldaý úshin «Kınematografııa týraly» QR Zańyna túzetý engiziledi. Sol úshin «Qazaqstan Respýblıkasynyń keıbir zańnamalyq aktilerine aqparat, qoǵamdyq damý, mádenıet jáne muraǵat isi salalaryndaǵy normalardyń shamadan tys zańnamalyq retteýdi boldyrmaý máseleleri jónindegi ózgerister men tolyqtyrýlar engizý týraly» Zań jobasy Senattyń qaraýynda jatyr, - dedi Mádenıet jáne aqparat mınıstri.

Onyń aıtýynsha, «Eýrazııa» halyqaralyq kınofestıvalin uıymdastyrý quqyǵy «Qazaqfılmge» qaıtarylǵan. Endi Almaty qalasynyń ákimdigi alyp qoıǵan 5,5 gektar jer telimin ulttyq kıno stýdııasyna qaıtarý máselesi pysyqtalyp jatqan kórinedi.