Abaqtydan shyqqan jambyldyqtar kásipkerlikti meńgerýdi úırendi
Jambyl oblysynyń ishki ister departamenti Qylmystyq atqarý júıesi departamentiniń probatsııa qyzmetimen birlese otyryp, sondaı-aq, oblystyq ákimdiktiń jastar saıasaty máseleleri basqarmasynyń qatysýymen «Nátıjeli jumyspen qamtýdy jáne jappaı kásipkerlikti damytý» taqyrybynda kezdesý ótkizdi.
Kezdesýdiń maqsaty, muqtaj adamdarǵa áleýmettik jáne zańgerlik qoldaý kórsetý, memlekettik baǵdarlamalardy túsindirip, temir tordyń arjaǵynan oralǵan jáne probatsııalyq qyzmetterde esepte turǵan azamattarǵa kómektesý.
Jıynǵa probatsııa qyzmetinde esepte turǵan 300-ge jýyq adam qatysty. Kezdesýge shaqyrylǵan kesipkerlik jáne áleýmettik baǵdarlamalar salasynyń mamandary jıynǵa qatysýshylarǵa túsindirý jumystaryn júrgizip, áleýmettik jáne basqa da kómekter kórsetti. «Halyqtyq bıznes» qoǵamdyq qory buryn abaqtyda bolǵandarǵa bolashaqta kásipkerliktiń qandaı túrimen aınalysýǵa bolatynyn, bıznestegi alǵashqy paıda kózderin tabý sııaqty alǵysharttardy túsindirdi.
Aýylsharýashylyǵy basqarmasy, din isteri departamenti, bilim basqarmasy, jumyspen qamtý jáne áleýmettik baǵdarlamalardy úılestirý basqarmasynyń mamandary jıyn qatysýshylaryna memlekettik baǵdarlamalardyń ońtaıly tustaryn aıtyp ótti.
Bıyl sonymen qatar, aýdan ortalyqtary men eldimekenderge shyqqan «Elbasy Joldaýy-jańǵyrýdyń jańa kezeńi», «Rýhanı jańǵyrý!», «Bolashaqqa baǵdar» avtokerýenderi keńes berý alańdaryn uıymdastyrǵan bolatyn.
Avtokerýen aıasynda aqparattyq-metodıkalyq materıaldar taratylyp, sheberlik sabaqtary ótkizildi. Din taqyryby boıynsha saýalnamalar alynyp, «Adasqandar» jáne «Taǵdyr tálkegi» spektaklderi qoıyldy. Probatsııalyq qyzmette esepte turǵan jastarmen kezdesý ótkizilip, tegin medıtsınalyq tekserýler uıymdastyryldy.
Uıymdastyrylǵan avtokerýen aıasynda barlyǵy 20 myńnan astam adamǵa kómek kórsetildi. Onyń ishinde 29 jasqa deıingi jastar da bar.
