Abaev «Jýsan» operatsııasy jaıly: Arnaıy qyzmet otandastarymyzdy tozaqtan alyp shyqty

ASTANA. QazAqparat - Aqparat jáne kommýnıkatsııalar mınıstri Dáýren Abaev Sırııadaǵy otandastarymyzdy qaıtarý boıynsha qazaqstandyq arnaıy qyzmettiń júzege asyrǵan «Jýsan» operatsııasy týraly pikirin bildirdi, dep habarlaıdy QazAqparat tilshisi.

«Men bul azamattardy bizdiń arnaıy qyzmettegiler naǵyz tozaqtan alyp shyqty desem artyq aıtqanym emes. Sondyqtan, Memleket basshysy atalmysh operatsııany óziniń jeke baqylaýyna alǵan bolatyn. Óz kezeginde Ulttyq qaýipsizdik komıteti men QR SІM óte aýqymdy ári aýyr jumysty atqarǵanyn aıta ketý kerek», - deıdi Dáýren Abaev.

Mınıstrdiń aıtýynsha, Sırııaǵa ketkenderdiń kóbi dinı sebepterge baılanysty eldi tastap ketken.

«Áıelder erleriniń sońyna ere barǵan. Al Sırııaǵa barǵannan keıin musylmandar musylmandardy qalaı qyryp jatqanyna kýá bolǵan. Ashyqtan ashyq darǵa asý - kúndelikti kóretin jaǵdaı bolyp ketken. Tonaýshylyq keń etek jaıǵan. Balalardy jaýyngerlik lagerlerde daıyndaǵan. Eri qaıtys bolǵan áıelderdi birden basqaǵa bere salyp otyrǵan. Mundaımen betpe-bet kelgen keıbir qazaqstandyqtar qashyp ta ketpek bolǵan. Alaıda terrorıster qashqandardy ustap, óltiretin arnaıy jazalaý jasaǵyn qurǵan. Ol az deseńiz, lagerlerden shyǵatyn joldardyń bárine bomba qoıylǵan. Tek ótken jyly ǵana terrorısterdiń basshylyǵyna synı pikir aıtqan 7 qazaqstandyq darǵa asylǵany belgili boldy», - deıdi Dáýren Abaev.

Mınıstrdiń aıtýynsha, áıelder men balalar eshqandaı medıtsınalyq jaı-kúıi joq, azyq-túligi jetkiliksiz kúıde palatkaly lagerlerde turǵan.

«Sóz aıaǵynda shaǵyn ǵana bir jaıdy aıta ketsem deımin: ol jaqtaǵy bizdiń otandastar qutqarylatyny týraly operatsııa jaıly estigen kezde qýanǵandarynan barlyq qundy zattaryn satyp, sol aqshaǵa merekelik dastarhan jaıý úshin bir taýyq satyp alǵan eken. Meniń oıymsha, olardyń jaǵdaıy týraly budan artyq aıtýdyń da qajeti joq», - deıdi Dáýren Abaev.

Eske sala ketsek, keshe Memleket basshysy Nursultan Nazarbaev Sırııadan Qazaqstan azamattaryn evakýatsııalaý boıynsha gýmanıtarlyq operatsııaǵa baılanysty málimdeme jasaǵan bolatyn. Memleket basshysy atap ótkendeı, 6 qańtarda quqyq qorǵaý organdary men Syrtqy ister mınıstrligi júrgizgen gýmanıtarlyq shara nátıjesinde Sırııadan Qazaqstannyń 47 azamaty, sonyń ishinde 30 bala elge qaıtaryldy.