Abaev: Sadaqaǵa arnalǵan termınaldar QMDB-nyń ashyqtyqqa umtylyp otyrǵanyn dáleldeıdi
«Ashyq dıalog» baǵdarlamasynda QR Aqparat jáne qoǵamdyq damý mınıstri Dáýren Abaev osylaı dedi, dep habarlaıdy QazAqparat tilshisi.
«Bul óte mańyzdy jumys. Bul bastamanyń ózin Qazaqstan musylmandary dinı basqarmasynyń bastap otyrǵany erekshe qýantady. Bul degenińiz – dinı basqarmamyzdyń ashyqtyqty, esep berýdi qoldap otyrǵanyn dáleldeıdi. Sol sebepti, termınaldardy ornatyp, halyqqa túsindirý jumystaryn júrgizý – búkil el boıynsha qolǵa alynady», - dedi Dáýren Abaev.
Mınıstr bul baǵyttaǵy kelesi qadam – mobıldi qurylǵy, bank kartalary arqyly qurban shalý bastamasy bolatynyn atap ótti.
«Ol ne beredi? Ol eń aldymen azamattarǵa aýdarǵan qarajattyń muqtaj adamdarǵa anyq taratylatynyna kózderin jetkizip, senim uıalatady. Ol qarajat meshit jumysyn qoldaýǵa, jastardy medreselerde oqytýǵa, kóptegen ıgi iske jumsalady. Qurban shalý – senimge kelip tireledi. Shalǵan qurbany tıisti jerine baratynyna kúmán keltiretin azamattar bar. Qazir ondaı kúdikshil adamdardyń sany azaıary anyq», - dedi ol.
Eske sala ketsek, kúni keshe elordadaǵy «Áljan ana» meshitinde sadaqa salýǵa arnalǵan elektrondy termınal iske qosylǵan bolatyn.
