Abaev: Óńirler bıýdjetten sportqa jumsalatyn shyǵynnyń jyldyq lımıtin bekitýi kerek

NUR-SULTAN. QazAqparat –QR Mádenıet jáne sport mınıstri Dáýren Abaev óńir bıýdjetterinen sportqa jumsalatyn shyǵynnyń jyldyq lımıtin bekitýdi usyndy, dep habarlaıdy QazAqparat tilshisi.

«Taǵy bir mańyzdy másele – jergilikti bıýdjettiń jalpy sportqa jumsalatyn shyǵynynyń jyl saıynǵy lımıtin belgileý. Onyń kem degende 10 paıyzy jan basyna qarjylandyrýǵa baǵyttalýyn usynamyz.

Shyǵyn az bolsa, mehanızm ári ketse jarty jyl jumys isteıdi. Jan basyna qarjylandyrý mehanızmi shynaıy paıda ákelmese, oǵan adamdar senimsizdik tanyta bastaıdy», - dedi ol Úkimet otyrysynda.

Sondaı-aq, ol sport sektsııalary men shyǵarmashylyq úıirmelerin jan basyna qarjylandyrýdy halyqtyń oń baǵalap otyrǵanyn aıtty.

«Júz myńdaǵan bala men jasóspirim ýaqytyn sapaly ótkizýge múmkindik aldy. Aldaǵy on jyldyń kóleminde biz munyń zor nátıjesin kóremiz», - dedi mınıstr.

Onyń aıtýyna qaraǵanda, qazir elimizde 500 myńnan astam adam «Qazaq kúresi», «Toǵyzqumalaq», «Asyq atý» sııaqty ulttyq sport túrlerimen aınalysyp júr.

«2021 jyldan bastap dene shynyqtyrý sabaqtaryna ulttyq sport túrleri mindetti komponent bolyp engizildi. Qazir oqýshylar arasynda «Qazaq kúresi», «Toǵyzqumalaq» pen «Asyq atý» sııaqty sporttyq oıyndar keńinen tanymal.

2021 jyly 57 myń adam ulttyq sportpen aınalysa bastaǵan. Qazir elimizde tól sport túrlerimen shuǵyldanatyn adamdar sany 500 myńnan asady», - dedi Dáýren Abaev.