Abaev qazaq saıttarynyń negizgi mindetterin atady

ASTANA. QazAqparat - QR Aqparat jáne kommýnıkatsııalar mınıstri Dáýren Abaevtyń aıtýynsha, qazirgi texnologııalyq zamanda básekelestikke tótep berip, aqparat keńistiginen laıyqty oryn alý úshin qazaq tildi ınternet resýrstaryna birneshe mańyzdy máseleni sheshý kerek, dep xabarlaıdy QazAqparat tilshisi.

«Birinshiden, kontentke qatysty kózqarasty ózgertý kerek. Qazirgi kezde aqparattyń mazmunyn qalyptastyrýǵa qoldanýshylar tikeleı yqpal ete bastady. Ókinishke qaraı, osynyń saldarynan sensatsııanyń sońyna túsken saıttar jetkilikti. Árıne, bul rette aýdıtorııany udaıy zerttep, ár oqyrmannyń suranysyn eskerýge týra keledi. Alaıda kez kelgen máselege eldik múdde, ulttyq tanym men tárbıe, sondaı-aq jýrnalıstik etıka turǵysynan qaraý qajet dep oılaımyz. Buqaralyq aqparat quraldarynyń áleýmettik jeliden basty aıyrmashylyǵy da, artyqshylyǵy da osy», - dedi D.Abaev búgin qazaq saıttary redaktorlarynyń forýmynda.

Mınıstrdiń aıtýynsha, kelesi jyly aýyldyq jerde turatyn 2 mln-nan astam adamǵa sapaly ınternet tartý jumystary bastalady. Atalǵan sharalar eki jylda aıaqtalady degen jospar bar. Al 2022 jylǵa deıin Qazaqstannyń barlyq aýyldarynda jyldam ınternet bolady.

«Olarǵa qandaı kontent usynýǵa bolady? Mine, osy máseleni saıttarymyz qazirden bastap zerttep, kontenttik saıasatty jolǵa qoıa alsa, qoldanýshylardyń birneshe esege artatyny sózsiz. Endi, ózderińiz jaqsy bilesizder, aýyldy jerlerde, kóbinese, qazaq tildi baýyrlarymyz turady. Olar aldymen Sizderdiń saıttaryńyzǵa keledi, Sizderdiń basty tutynýshylaryńyz bolady», - dep atap kórsetti D.Abaev.

Ekinshi másele, el múddesi synǵa túskende qazaq tildi buqaralyq aqparat quraldary aldynǵy qatardan tabylsa da, ulttyq múddeniń jalań uranmen almasyp ketý jaǵdaılary az emes. Atalǵan áreketter, kóp jaǵdaıda, arandatýshylyq sıpatta kórinis berýde.

«Máselen, Astanadaǵy Ábý-Dabı Plaza oqıǵasyn alaıyq, biz Іshki ister mınıstrligimen birge zertteý júrgizdik. Sol kúni áleýmettik jelide jurttyń namysyna tıip, janjaldarǵa shaqyrǵan «patrıottyq» pikirlerdiń Astanadan jazylmaǵanyn kórdik. Osyndaı tasada otyryp, tas atý ádeti beleń alyp turǵany jasyryn emes. Jazǵandardyń kóbisi basqa qalalardan astanalyqtarǵa nege otyrsyńdar, qyryp joımasyńdar ma dep, urandatyp ketti», - deıdi mınıstr Abaev.

Mınıstrdiń sózine qaraǵanda, dástúrli buqaralyq aqparat quraldary men jańa medıanyń qarym-qatynasyn tereńdetý kerek. Bul - úshinshi másele. Sebebi búginde áleýmettik medıanyń basymdyǵy jaıynda jıi aıtylady. Alaıda sońǵy zertteýlerge sáıkes, teledıdar sııaqty dástúrdi buqaralalyq aqparat quraldarynyń yqpaly feısbýkten úsh ese artyq. Sondyqtan dástúrli BAQ pen jańa medıanyń múmkindikterin sheber ushtastyra bilgen jón.