Abaev: Eldik múdde jolynda tize qosyp qımyldaý - qasıetti paryzymyz
«Azamattarǵa, ásirese, óskeleń urpaqqa bilim berý – memlekettiń mańyzdy mindetteriniń biri. Al mádenıet – otbasynda jáne ósken ortada alǵan tárbıeden bastalady. Sol úshin qoǵamnyń mádenıetti bolýyna memleketpen qatar ár otbasy da jaýapty. Mundaı ortaq júkti memleket pen qoǵam tize qosyp, teńdeı kóterisýge tıis. Bul iste, ásirese, zııaly qaýymǵa artylar salmaq erekshe. Qaı zamanda da eldik máseleniń durys-burysyn el aǵalary baǵdarlap kelgen. Aǵylshyndar Shekspırmen maqtanyp, orystar Pýshkındi pir tutsa, biz de uly tulǵalarymyz ben klassıkterimizge súıenemiz. Eldik múdde jolynda tize qosyp qımyldaý barshamyzdyń qasıetti paryzymyz dep esepteımin», - dedi Prezıdent Ákimshiligi Basshysynyń birinshi orynbasary.
Ol taıaýda Jazýshylar odaǵynda bolyp, ıntellegentsııa ókilderimen kezdesýinde óz oılarymen bóliskenin atap ótti.
«Memleket basshysynyń tapsyrmasyna sáıkes elimizde qalamgerlerdi, ásirese jas aqyn-jazýshylardy qoldaý isi qarqyndy túrde jalǵasatyn bolady. Ótken jyly zııatkerlik qoǵamdastyǵynyń birqatar ókili Abaı atyndaǵy memlekettik syılyqqa laıyq dep tanyldy. Bıyl, Táýelsizdik kúni qarsańynda da kóptegen ádebıet ókilderi memlekettik nagrada alady. Jyl saıyn ádebıet pen mádenıet qaıratkerleri prezıdenttik stıpendııa beriledi», - dedi Dáýren Abaev.
