Abaev «Azamattar úshin úkimet» memkorporatsııasynda jemqorlyq faktileriniń baryna qynjyldy
ASTANA. QazAqparat - «Azamattar úshin úkimet» korporatsııasyndaǵy jemqorlyqqa qarsy jumystardy kúsheıtý qajet. Bul týraly búgin QR Aqparat jáne kommýnıkatsııalar mınıstrliginiń alqa otyrysynda vedomstvo basshysy Dáýren Abaev aıtty, dep habarlaıdy QazAqparat.
«Memlekettik korporatsııa jumysynda jemqorlyq táýekelderin atap ótkim keledi. Máselen, eki apta buryn Petropavlda memlekettik korporatsııanyń qyzmetkeri jemqorlyq faktisi boıynsha ustaldy. Mundaı faktiler bizdiń barlyǵymyzǵa «kóleńke» túsiredi dep sanaımyn. Sondyqtan aldaǵy ýaqytta mundaı faktilerge jol bermeý sharalaryn kúsheıtýdi tapsyramyn. Barlyqtaryńyz jeke jaýapkershilik arqalaıtyn bolasyzdar», - dedi ol.
Sonymen qatar mınıstrdiń aıtýynsha, aǵymdaǵy jyldyń 9 aıynda elimizde 30 mıllıonnan astam elektrondy qyzmetter kórsetilgen. 17 myńnan astam elektrondy lıtsenzııa, 433 myń ruqsat qujaty berilgen.
Búginde memlekettik qyzmetter tiziminde 739 ataý bar. onyń ishinde 530-yn elektrondy úkimet portalynan jáne memlekettik korporatsııadan alýǵa bolady. Azamattarǵa yńǵaıly bolýy úshin qajetti keńester alýǵa bolatyn 1414 biryńǵaı nómiri engizilgen.
Osy rette Abaev jyldyń sońyna deıin memlekettik korporatsııa arqyly elektrondy nysanda keminde 65 paıyz memlekettik qyzmetter kórsetýdi qamtamasyz etýdi, memkorporatsııaǵa berilgen jańa 53 memqyzmetti ıntegratsııalanǵan aqparat júıesine qosýdy aıaqtaýdy tapsyrdy.
