Abaev: Áleýmettik jeliniń damýy dástúrli jýrnalıstıka úshin aıtýly synǵa aınaldy

ASTANA. QazAqparat - «Habar» arnasyndaǵy «Ashyq dıalog» baǵdarlamasynda qonaq bolǵan QR Aqparat jáne kommýnıkatsııalar mınıstri Dáýren Abaev Qazaqstandaǵy jýrnalıstik ortaǵa ortaq másele týraly óz oıymen bólisti, dep habarlaıdy QazAqparat tilshisi.

Baǵdarlama tilshisi Dáýren Abaevtan jýyqta sóılegen sózine qatysty saýal tastady.

««Jas qalam» forýmynda siz sońǵy bes jylda qazaqstandyq jýrnalıstıka óziniń ótkirligin joǵaltyp aldy degen pikir bildirdińiz. Tilshiler qaýymy bul sózdi ártúrli qabyldady. Osy rette siz neni aıtqyńyz kelgenin uǵynsaq dep edik», - dedi «Ashyq dıalog» júrgizýshisi Aleksandr Klımanov.

Bul suraqqa qatysty mınıstr konteksten alynǵan osynaý sózdiń adal ári shynaıy eńbek etip júrgen jýrnalısterdiń kóńiline kelýi yqtımaldylyǵyna túsiniktikpen qaraıtynyn atap ótti.

«Biraq, eger aıtqan óz sózimnen bas tartar bolsam, kópti aldaǵanym bolar edi. Kóptegen basylymdardyń redaktorlarynyń ózi de osy máseleni - jýrnalıstik ortada kásibıliktiń tómendep bara jatqanyn jıi kóteredi. Ásirese, jas  kadrlardy daıarlaýda másele ótkir bolyp tur. Áleýmettik jeliniń damýy dástúrli jýrnalıstıka úshin aıtýly syn-tegeýringe aınalǵanyn da jasyrýǵa bolmaıdy», - deıdi mınıstr.

Dáýren Abaevtyń aıtýynsha, búgingi tańda laıktardyń, bólisýler men qaralymdardyń sany materıalǵa degen talaptardy almastyryp jatqany shyndyq.

«Aıtylyp júrgen klıpbeık taldaý nemese tergeý materıaldaryn, reportajdardy kóleńkesinde qaldyryp barady. Men bul sózdi jýrnalıstik ortaǵa qarsy aıtqan joqpyn, men bárimizge ortaq máseleni aıttym. Bul úshin de men salaly mınıstrliktiń basshysy retinde de jaýaptymyn», - dep túıdi Dáýren Abaev.