AÁK taǵaıyndaýdyń jańa tártibi bekitildi: kimderdiń tólemi toqtatylady

Ataýly áleýmettik kómek (AÁK) jan basyna shaqqandaǵy ortasha tabysy óz óńirinde belgilengen kedeılik sheginen aspaıtyn azamattar men otbasylarǵa beriledi. AÁK-niń shartsyz jáne shartty aqshalaı kómek túrleri bar.

Jańa tártip boıynsha qaladaǵy aýdan, aýdandyq mańyzy bar qala, kent, aýyl jáne aýyldyq okrýg ákimderi turmysy tómen azamattardy anyqtaıdy.

Túsindirý jumystary júrgizilgennen keıin azamattar ataýly áleýmettik kómek alýǵa ótinishti tıisti mekeme, elektrondyq úkimet portaly nemese uıaly telefon arqyly bere alady. Ótinish bergen kezde jeke kýálik nemese qandas kýáligi qajet. Qujattardyń elektrondyq nusqasyn da paıdalanýǵa bolady.

AÁK alýǵa úmitker azamattar men otbasylar jeke derekterin jınaýǵa, óńdeýge, tekserýge, jańartýǵa jáne basqa mekemelerge berýge kelisim berýi tıis. Bul talap bank qupııasyna jáne zańmen qorǵalatyn ózge de málimetterge qatysty. Sondaı-aq azamattar memlekettik qatysýy bar kredıttik bıýrodan nesıe qaryzynyń mólsheri, aı saıynǵy tólemderi men merzimi ótken bereshegi týraly málimet alýǵa kelisim berýi tıis.

Eger otbasynda birge turatyn, eńbekke jaramdy ári jumyspen qamtý sharalaryna qatysýy kózdelgen azamattar bolsa, olardyń jumys izdeýshi retinde tirkelýine arnalǵan ótinish te qosa beriledi.

Al 16 jasqa tolmaǵan adamnyń eńbek etýine ata-anasynyń biri nemese zańdy ókili jazbasha kelisim berýi qajet. Mundaı ótinish erkin túrde jazylady.

Ataýly áleýmettik kómek qalaı taǵaıyndalady

Jańa tártip boıynsha azamattar AÁK alýǵa elektrondyq úkimet portaly arqyly ótinish bere alady. Sonymen qatar kómekti jeke ótinishsiz, avtomatty túrde taǵaıyndaý múmkindigi qarastyrylǵan.

Ol úshin otbasy ýchaskelik komıssııanyń materıaldyq jaǵdaıyn tekserýine kelisim berýi kerek. Osy kelisim alynǵan kún ataýly áleýmettik kómekke júgingen kún bolyp esepteledi.

Tótenshe jaǵdaı kezinde AÁK alyp júrgen azamattarǵa tólem avtomatty túrde kelesi toqsanǵa uzartylady. Bul úshin qaıta ótinish berýdiń qajeti joq.

Ótinishti tekserý barysynda qujattardan qate nemese sáıkessizdik anyqtalsa, olar tsıfrlyq kútý paraǵy arqyly qabyldanyp, memlekettik qyzmet kórsetý ýaqytsha toqtatylady. Azamatqa kemshilikterdi túzetý úshin bes jumys kúni beriledi. Eger ol osy merzimde qajetti málimetterdi tolyqtyrsa, ótinish alǵash tapsyrylǵan kúni qabyldanǵan bolyp esepteledi.

Qajetti málimetter jınalǵannan keıin mansap ortalyǵy úsh jumys kúni ishinde azamatqa qandaı kómek beriletinin anyqtap, otbasynyń tabysyn esepteıdi. Esepteý kezinde ótinish berilgen toqsannyń aldyndaǵy úsh aıdaǵy jıyntyq tabys eskeriledi.

Ataýly áleýmettik kómektiń mólsheri óńirdegi kedeılik shegi men otbasynyń jan basyna shaqqandaǵy ortasha tabysynyń aıyrmasy negizinde esepteledi. Bul aıyrma otbasynyń ár múshesine jeke esepteledi.

Budan bólek, AÁK taǵaıyndalǵan kezeńde bir jastan alty jasqa deıingi balalarǵa aı saıyn qosymsha tólem beriledi. Onyń mólsheri ár balaǵa 1,5 aılyq eseptik kórsetkishti (AEK) quraıdy.

Jergilikti atqarýshy organdarǵa óńirdiń ereksheligin eskere otyryp, úıdegi mal, qus jáne jer telimin tabys ákelmeıtin múlik qataryna jatqyzý máselesin sheshý quqyǵy beriledi.

Kómek alýshylarǵa qandaı mindetter júkteledi

Shartty aqshalaı kómek taǵaıyndalǵan jaǵdaıda mansap ortalyǵy otbasyndaǵy jumyssyz, eńbekke jaramdy azamattardyń sanyn anyqtaıdy. Olardy jumys izdeýshi retinde tirkep, qajetti qujattardy halyqty jumyspen qamtý máseleleri jónindegi komıssııanyń qaraýyna jiberedi.

Ýchaskelik komıssııanyń qorytyndysy alynǵannan keıin mansap ortalyǵy úsh jumys kúni ishinde jeke jospar ázirleıdi. Onda azamatty jumyspen qamtý jáne áleýmettik beıimdeý sharalary kórsetiledi. Osy jospar negizinde kómek alýshymen áleýmettik kelisimshart jasalady.

Áleýmettik kelisimshart shartty aqshalaı kómek taǵaıyndalǵan búkil kezeńge jasalady. Qujatta eki taraptyń mindetteri, jumyspen qamtý jáne áleýmettik beıimdeý sharalaryna qatysý tártibi, sondaı-aq kelisim talaptary oryndalmaǵan jaǵdaıda qoldanylatyn sharalar jazylady.

Shartty aqshalaı kómek tabysy tómen, eńbekke jaramdy jalǵyzbasty nemese jeke turatyn azamattarǵa, sondaı-aq quramynda eńbekke jaramdy múshesi bar turmysy tómen otbasylarǵa aı saıyn tólenedi.

Bul kómek ózin-ózi jumyspen qamtyǵandarǵa arnalǵan arnaýly salyq rejımin qoldanatyn azamattarǵa da berilýi múmkin. Ol úshin olar jumyspen qamtý nemese áleýmettik beıimdeý sharalaryna qatysýy tıis.

Shartty aqshalaı kómek ótinish berilgen aıdan bastap sol toqsannyń sońyna deıin taǵaıyndalady jáne aı saıyn tólenedi.

Qandaı jaǵdaıda ataýly áleýmettik kómek toqtatylady

Jańa ózgeristerde ataýly áleýmettik kómek tóleýdi toqtatýǵa negiz bolatyn jaǵdaılar da naqtylanǵan.

Atap aıtqanda, mynadaı jaǵdaılarda tólem toqtatylady:

— ótinish berýshi qaıtys bolsa;
— azamat turaqty turý úshin respýblıkalyq nemese oblystyq mańyzy bar basqa qalaǵa, ózge aýdanǵa ne Qazaqstannan tys jerge kóshse;
— kómek alýshy áleýmettik kelisimshart talaptaryn nemese jeke josparda kórsetilgen mindetterin tolyq oryndamasa, onyń ishinde jumyspen qamtý sharalaryna qatysýdan jáne jumysqa ornalasýdan bas tartýyna baılanysty kelisimshart buzylsa;
— azamat jalǵan málimet nemese shyndyqqa sáıkes kelmeıtin qujat usynyp, sonyń negizinde ataýly áleýmettik kómekti zańsyz alsa.

Ataýly áleýmettik kómekti taǵaıyndaý jáne tóleý tártibine engizilgen ózgerister 2027 jylǵy 1 qańtardan bastap qoldanysqa engiziledi.

Aıta keteıik, buǵan deıin AÁK taǵaıyndalǵanda azamattardyń kredıti men depozıti eskeriletini habarlandy.