AÁK taǵaıyndaý úshin kedeılik shegi halyqtyń medıandyq kirisinen aıqyndalady
ASTANA. KAZINFORM — 2025 jylǵy 1 qańtardan bastap ataýly áleýmettik kómek taǵaıyndaý úshin kedeılik shegi halyqtyń medıandyq kirisinen aıqyndalady. Bul týraly Ortalyq kommýnıkatsııalar qyzmetindegi brıfıngte Eńbek jáne halyqty áleýmettik qorǵaý vıtse-mınıstri Oljas Anafın aıtty.
— Eńbek jáne halyqty áleýmettik qorǵaý mınıstrligi Ulttyq statıstıka bıýrosymen birlesip, Otbasynyń tsıfrlyq kartasy derekteri boıynsha toqsan saıynǵy medıandyq kiris mólsherine esepteýler júrgizdi. Olardyń nátıjeleri boıynsha kedeılik shegi medıandyq kiristiń 35 paıyz deńgeıinde, biraq qazirgi deńgeıden tómen emes, ıaǵnı óńirlik eń tómen kúnkóris deńgeıiniń 70 paıyz deńgeıinde aıqyndalǵan. Kedeılik shegin anyqtaýda medıandyq kiristi engizý ataýly áleýmettik kómek mólsheriniń azaıýyna ákelmeıtinin atap ótý mańyzdy. Sonymen qatar, AÁK alýshylar sany 755 otbasyna nemese 3,8 myńnan astam adamǵa ósýi múmkin dep boljanýda, — dedi Oljas Anafın.
Vıtse-mınıstrdyń aıtýynsha, 2025 jyly materıaldyq jaǵdaıdy zertteý negizinde otbasylardyń AÁK kórsetýge muqtajdyǵy týraly qorytyndylar shyǵaratyn ýchaskelik komıssııalardyń qyzmetin tsıfrlandyrý júzege asyrylady. Bul komıssııalar úshin FSM Social mobıldi qosymshasy jasaldy. Onyń artyqshylyǵy: geolokatsııany anyqtaý (ótinish berýshiniń naqty geografııalyq orny); jedel sheshim qabyldaý jáne qorytyndy shyǵarý rásimin ońaılatý; zertteý júrgizý jáne sheshim shyǵarý kezinde formaldy tásildi alyp tastaý. Mobıldi qosymsha pılottyq rejımde Almaty oblysynyń Qonaev qalasynda synaldy. 2025 jylǵy qańtardan bastap FSM Social qosymshasyn búkil el boıynsha engizý josparlanǵan.
Buǵan deıin AÁK-ke ótinish bergen azamat kiristeri men shyǵystaryn tekserýge kelisim beretindigin jazǵan edik.