AÁK alýshylar azyq-túlikti tsıfrlyq vaýcher arqyly tómen baǵamen satyp alady

ASTANA. KAZINFORM — Qazaqstanda ataýly áleýmettik kómek (AÁK) alýshylarǵa tsıfrlyq azyq-túlik vaýcherin berý boıynsha pılottyq joba iske qosyldy. Bul bastama halyqtyń áleýmettik osal toptaryn qoldaýǵa jáne áleýmettik mańyzy bar azyq-túlik taýarlaryn qoljetimdi etýge baǵyttalǵan.

Joba negizinde baǵalardy turaqtandyrýǵa arnalǵan «aınalym shemasy» tetigi jatyr. Saýda jelilerine jeńildetilgen qaıtarymdy nesıe beriledi, al olar óz kezeginde AÁK alýshylarǵa áleýmettik mańyzy bar azyq-túlikti naryqtyq baǵadan 15%-ǵa tómen baǵamen satýǵa mindetteledi.

Pılottyq joba Aqmola oblysynyń Aqkól qalasynda iske qosylyp, aldaǵy ýaqytta Kókshetaý men Pavlodarda jalǵasady.

- Tsıfrlyq vaýcherler «eGov Mobile» qosymshasyndaǵy «Áleýmettik ámııan» servısi arqyly usynylady. AÁK alýshy dúken kassasynda QR-kodty usyna otyryp, jeńildikti avtomatty túrde paıdalana alady. Vaýcherdiń somasy otbasy músheleriniń sanyna qaraı esepteledi – ár adamǵa bir aılyq eseptik kórsetkish, ıaǵnı 2025 jyly 3 932 teńge. Mysaly, tórt adamnan turatyn otbasy aıyna shamamen 16 myń teńgeniń vaýcherin paıdalana alady, - dep jazdy Saýda jáne ıntegratsııa mınıstrliginen.

Joba turaqtandyrý qorynyń esebinen qarjylandyrylyp, onyń 35%-y kásipkerlerge jeńildetilgen nesıe berýge, 65%-y otandyq óndirýshiler men fermerlerden ónimdi forvardtyq satyp alýǵa baǵyttalady.

Pılottyq kezeńniń nátıjesine qaraı bastama elimizdiń ózge óńirlerinde de keńinen engiziledi.

Joba 245 myńnan astam AÁK alýshyny qamtyp, ádil ári ashyq áleýmettik kómek júıesin qalyptastyrýǵa múmkindik beredi.