AÁK alatyn otbasylarǵa jumys tabýǵa da múmkindik beriledi
ASTANA. KAZINFORM — Qazaqstanda tabysy tómen otbasylarǵa áleýmettik kómek kórsetýmen qatar, olardyń jumyspen qamtylýyna da qoldaý beriledi. Mundaı tásil azamattarǵa qıyn kezeńde qarjylaı kómek kórsetip qana qoımaı, óz tabysyn tabýyna múmkindik berýge baǵyttalǵan.
Áleýmettik qoldaýdyń negizgi sharalarynyń biri – ataýly áleýmettik kómek (AÁK). Ol tabysy tómen otbasylar men azamattarǵa olardyń materıaldyq jaǵdaıyn eskere otyryp taǵaıyndalady. Osy jyldyń 1 tamyzdaǵy jaǵdaı boıynsha elimizde 38,7 myń otbasy AÁK alyp otyr.
Alaıda áleýmettik kómek tek aqshalaı tólemmen shektelmeıdi. Eger otbasynda eńbek etýge qabiletti azamattar bolsa, olardyń jumysqa ornalasýyna jáne tabysyn arttyrýyna múmkindik beretin sharalar da usynylady.
Azamattyń jaǵdaıyna qaraı oǵan turaqty nemese ýaqytsha jumys, kásiptik oqytý jáne qaıta daıarlaý, biliktiligin arttyrý, qoǵamdyq jáne áleýmettik jumys oryndaryna ornalasý múmkindigi beriledi. Sondaı-aq jeke isin ashqysy keletin azamattarǵa kásipkerlik negizderin úıretý qarastyrylǵan.
Áleýmettik kómektiń maqsaty – adamdy uzaq ýaqyt boıy járdemaqy alýshy retinde qaldyrý emes. Negizgi mindet – otbasynyń qıyn kezeńnen shyǵýyna kómektesip, múmkindiginshe óz betinshe turaqty tabys tabýyna jaǵdaı jasaý.
Bul jumysta Mansap ortalyqtarynyń róli mańyzdy. Olardyń mamandary azamatqa laıyqty jumys tabýǵa, qandaı mamandyq boıynsha oqýdan ótý qajet ekenin anyqtaýǵa jáne jaǵdaıyna qaraı jumyspen qamtýǵa baǵyttalǵan basqa da qoldaý sharalaryn tańdaýǵa kómektesedi.
Kishkentaı balalary bar otbasylarǵa da qosymsha áleýmettik qoldaý kórsetiledi. Atap aıtqanda, AÁK alatyn otbasylarǵa bir jastan alty jasqa deıingi balalardyń árqaısysyna aı saıyn qosymsha tólem beriledi. Bul rette otbasynyń eńbekke qabiletti músheleri jumyspen qamtý sharalaryna qatysa alady.
Eńbek jáne halyqty áleýmettik qorǵaý mınıstrligi áleýmettik qoldaý ár adam úshin naqty nátıjege jetkizýi kerek degen ustanymda. Eger azamattyń eńbek etýge múmkindigi bolsa, oǵan qajetti kómekpen qatar suranysqa ıe mamandyqty meńgerýge, ózine laıyqty jumys tabýǵa jáne otbasynyń tabysyn arttyrýǵa múmkindik berilýi mańyzdy.
Áleýmettik kómek pen jumyspen qamtý sharalaryn qatar júrgizý arqyly eki mańyzdy mindet sheshiledi. Birinshisi – qıyn jaǵdaıǵa tap bolǵan azamattarǵa qajetti qoldaý kórsetý. Ekinshisi – olardyń aldaǵy ýaqytta óz tabysyn ózi qamtamasyz etip, ekonomıkalyq turǵydan derbes bolýyna jaǵdaı jasaý.
