A.Jumaǵalıev Kólik jáne kommýnıkatsııa mınıstrliginiń qurylymdyq bólimsheler jumysy tıimdiligin anyqtaıtyn kórsetkishterdi jasaýdy tapsyrdy
ASTANA. 24 qańtar. QazAqparat - QR Kólik jáne kommýnıkatsııa mınıstri Asqar Jumaǵalıev vedomstvo ujymymen kezdesý ótkizdi.
Kezdesýde kólik-kommýnıkatsııa salasynyń aldynda turǵan perspektıvalyq mindetteri men vedomstvonyń fýnktsııalarynyń keńeıýine baılanysty jumys órisi talqylandy.
Sondaı-aq, Asqar Jumaǵalıev qurylymdyq bólimshelerdiń basshylaryna komıtetter men departamentterdiń jáne búkil vedomstvonyń jumys tıimdiligin anyqtaıtyn kórsetkishterdi (KRІ) jasaýdy tapsyrdy.
Vedomstvonyń basymdyq berilgen mindetterin aıta kele, ol mınıstrliktiń qyzmetterin avtomattandyrý qajettiligine nazar aýdardy. Mınıstrdiń aıtýynsha, «memlekettik qyzmetterdi elektrondyq formatqa aýystyrý sybaılas jemqorlyqtyń paıda bolýyn azaıtady».
Buǵan qosa, vedomstvo basshysy kóliktik qyzmet kórsetý servısiniń deńgeıin kóterý, avtomobıl joldary qurylysynyń sapasyn arttyrý, tehnıkalyq tekserýden ótý stansalarynyń sanyn kóbeıtý, azamattyq avıatsııany damytý sekildi kólik-kommýnıkatsııa salasyndaǵy ózge de kóptegen máselelerge nazar aýdardy.
A.Jumaǵalıev kólik salasyndaǵy sybaılas jemqorlyq máselesine de toqtalyp, onyń damýyna aparatyn joldardy joıýǵa baǵyttalǵan is-sharalar júrgizý qajettiligin atap ótti.
Mınıstr byltyr osyndaı máselege tap bolǵan halyqqa qyzmet kórsetý ortalyqtaryndaǵy jaǵdaıdy mysal retinde keltirdi. HQKO-nda júrgizilgen jumys sybaılas jemqorlyqty boldyrmaýmen qatar, oǵan jol beretin alǵysharttaryn joıýǵa múmkindik berdi.
