A. Jumaǵalıev: Qazaqstanda analogtyq habar taratý kezeń-kezeńmen óshirilmek
ASTANA. QazAqparat - Qazaqstanda analogtyq habar taratýdy kezeń-kezeńmen óshirý josparlanýda. Bul týraly QR Baılanys jáne aqparat agenttiginiń tóraǵasy Asqar Jumaǵalıevke silteme jasaı otyryp Kazpravda.kz habarlady.
«Biz halyqty sandyq efırlik habar taratýmen qamtýdy qarastyramyz, sóıtip Qazaqstan óńirleri boıynsha kezeń-kezeńmen «analogty» sóndirý josparlanýda. Árıne, naqty eldi meken turǵyndarynyń ulttyq seriktik, sandyq efırlik teledıdar, kábildik jáne IDTV arqyly otandyq telearnalarǵa qoljetimdiligi eskeriledi», dep habarlady agenttik basshysy. A. Jumaǵalıev qazaqstandyqtar analogtyq teledıdar óshiriletini týraly aldyn ala habarlanatyn bolady dedi. Vedomstvo basshysy eldegi sandyq teledıdardy damytý perspektıvasymen oı bólisti. Eger aýyldyqtar eskirgen analogtyq sapada keminde 5 arnany tamashalasa, endi olarǵa zamanaýı sandyq sapada 15-ten 30 arnaǵa deıin, al jerserik arqyly 30 arna kórsetiledi.
QR BAA derekterine súıensek, búginde Qazaqstanda 750 myń otbasy nemese 3 mln. adam sandyq teledıdarǵa qosylǵan. «Mańǵystaý oblysynda óńirdiń 70 paıyzy sandyq efırlik nemese seriktik teledıdarǵa, olardyń 20 paıyzdan astamy sandyq efırlik teledıdarǵa qosylǵan. Buryn bul óńirdiń ortalyq bóligine analogtyq belgi múldem jetpegen, shekaralas aýdandarda eldi mekender tek kórshi elderdiń arnalaryn kórýge týra kelgen», dep mysal keltirdi A. Jumaǵalıev.
Eske sala keteıik, 2012 jylǵy 3 shildede Memleket basshysymen respýblıkalyq telekópir barysynda efırlik sandyq teledıdar júıesi iske qosylǵan. «Qazaqstanda sandyq teledıdardy engizý - eldiń údemeli ındýstrııalandyrý tarmaqtarynyń biri. Bizge jańa tehnıka, jańa tehnologııa keldi. Bul sapany arttyrady. Sóıtip Qazaqstannyń búkil aýmaǵy ulttyq teledıdar arnalarynyń belgilerin qabyldaıtyn bolady», - degen bolatyn N. Nazarbaev. Sol kúni sandyq teledıdar 370 eldi mekende paıda boldy.
