A.Jumaǵalıev birqatar halyqqa qyzmet kórsetý ortalyqtary boıynsha qyzmettik tekseristerdi júrgizýdi tapsyrdy

Atap aıtqanda, mınıstr Astana qalasyndaǵy Almaty aýdanynyń, sondaı-aq Almaty qalasyndaǵy Medeý aýdandyq halyqqa qyzmet kórsetý ortalyqtarynda oryn alǵan zańsyzdyqtar boıynsha qyzmettik tekserýlerdi júrgizip, bir aptanyń ishinde esep berýdi tapsyrdy. Sonymen qatar QR Baılanys jáne aqparat mınıstrligi Halyqqa qyzmet kórsetý ortalyqtarynyń jumysyn úılestirý jáne memlekettik qyzmetterdi avtomattandyrý jónindegi komıtet júrgizgen baqylaý is-sharalary barysynda Almaty oblysynyń Tekeli jáne Qarasaı aýdandyq HQKO birinshi basshylarynyń qaramaǵyndaǵy qyzmetkerlerden aqsha bopsalaǵandary anyqtaldy. Al Qostanaı oblysynyń halyqqa qyzmet kórsetý ortalyǵy dırektorynyń orynbasary memlekettik satyp alýlar kezinde zańsyz áreketke barǵan. Qazirgi kezde osy zań buzýshylyqtar boıynsha qylmystyq ister qozǵalyp, tergeý amaldary júrgizilýde.

«Bárimiz jaqsy bilemiz, Prezıdent mınıstrlikke ortalyqtardyń jumysyn jetildirýdi, halyqqa sapaly qyzmet kórsetýdi qadaǵalaýdy, sybaılas jemqorlyqtyń aldyn alýdy, sondaı-aq memlekettik qyzmetterdi avtomattandyrý jumysyn tezdetýdi tapsyrǵan bolatyn. Sondyqtan men Sizderge aıtaıyn, qazirgi qolǵa alynyp jatqan is-sharalar - bul naýqanshylyq emes, bul - turaqty túrde júrgiziletin jumys bolmaq», - dep atap kórsetti mınıstr A.Jumaǵalıev.