A.Jubanov atyndaǵy mýzykalyq mektep-ınternattyń 50 jyldyǵyna arnalǵan kesh ótedi
ASTANA. QazAqparat - Almatydaǵy Ahmet Jubanov atyndaǵy daryndy balalarǵa arnalǵan respýblıkalyq mamandandyrylǵan mýzykalyq mektep-ınternatyna bıyl 50 jyl tolyp otyr.
Atalmysh mektep 1964 jyly qazaq óneriniń qaıratkeri, Qazaqstannyń Halyq artısi, akademık Ahmet Jubanovtyń bastamasymen elimizdiń túkpir-túkpirindegi daryndy balalardy jınap, memlekettik tilde kásibı mýzykalyq bilim berý maqsatynda ashylǵan bolatyn. Ol daryndy mýzykanttardy tárbıelep, tek Qazaqstannyń ǵana emes, álemniń mýzyka óneriniń damýyna óz úlesin qosyp kele jatyr.
Óner ordasynyń jarty ǵasyrlyq mereıtoıy qarsańynda - 23-sáýirde mektep-ınternattyń úlken zalynda búginde elimizben qatar, birqatar shet memleketterge tanymal «Sazgen sazy» folklorlyq-etnografııalyq ansamblindegi mektep túlekteriniń jeke oryndaýlarynda shyǵarmashylyq kesh ótedi, dep habarlaıdy qazaq-alemi.kz.
