A.Janteleevtiń isine qatysty sheshim qabyldaýda kimniń múddesin qoldaǵan durys degen tańdaý bolǵan joq - Bas prokýratýra
ASTANA. Jeltoqsannyń 10-y.QazAqparat /Aıdar Ospanalıev/ - Ekonomıkalyq qylmysqa jáne sybaılas jemqorlyqqa qarsy kúres agenttiginiń Almaty qalasy boıynsha departamenti basshysynyń orynbasary Aıdyn Janteleevke qatysty qylmystyq isti Bas prokýratýra onyń áreketinen qylmys belgileriniń joqtyǵyna baılanysty toqtatty.
Mundaı sheshim qabyldaýǵa Ulttyq qaýipsizdik komıteti ókilderiniń qarjy polıtsııasy qyzmetkerin ustaý barysynda zańdy óreskel túrde buzý áreketteri negiz boldy. Bul jaıly jýrnalıstermen bolǵan aptalyq brıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.
Onyń sózine qaraǵanda, Ulttyq qaýipsizdik komıteti qyzmetkerleriniń zańsyz áreketteri prokýratýra qyzmetkerleriniń A.Janteleevtiń isine qatysty kúmán týdyrǵan negizgi sebepterdiń biri. «Kúmándi máselelerdiń barlyǵy aıyptalýshynyń paıdasyna sheshilýi qajet. Bul Konstıtýtsııa ustanymy. Sondaı-aq A.Janteleevti ustaý barysynda Ulttyq qaýipsizdik qyzmetkerleri eshqandaı negizsiz jáne zańnan tys onyń qolyna qolyna kisen salyp, joq jerden paıda bolǵan 4 kýágerdiń kózinshe medıtsınalyq tekserýden ótýge májbúrlegen. Osy rette aıta ketetin másele, A.Janteleevtiń isine qatysty sheshim qabyldaýda kimniń múddesin qoldaǵan durys degen tańdaý bolǵan joq. Prokýratýra tıisti dálelder jetispeıtin kez kelgen isti toqtata alady», dedi resmı ókil.
