Á.Jaqsybekov: Jolaýshylar tasymaly astanalyq qyzmet kórsetýdiń joǵary talaptaryna saı bolýy tıis
ASTANA. QazAqparat - «Aqyldy qalanyń» eń aldymen zamanaýı ınfraqurylymy bolýy kerek. Elordanyń jańa ıntellektýaldyq kólik júıesin júzege asyrý Astana ákimdiginiń búgingi apparattyq keńesinde talqylanǵan basty máselelerdiń biri boldy.
Qozǵalys aǵynynyń qarqyndylyǵy men jyldamdyǵynyń ortasha kórsetkishteriniń azdap artqanyna qaramastan, joldaǵy keptelister ózegin joǵaltpaı otyr. Eske sala keteıik, jańa kólik júıesi jobasynyń birinshi kezegi 42 qıylysty qamtydy. Jobanyń ekinshi kezeginde qoǵamdyq kólikterge elektrondyq tólem júıesin iske qosý kózdelgen. Qazirdiń ózinde elordanyń avtobýs parkteri jańalandy. Oǵan qosa, buǵan deıin de aıtylǵandaı, Astana jaqyn ýaqytta zamanaýı 200 avtobýspen qamtamasyz etiledi. Astana qalasynyń ákimi Ádilbek Jaqsybekovtiń aıtýynsha, áýeli jolaýshylar tasymalynyń sapasy jaqsartylýy tıis. Qazirgi ýaqytta bul baǵyt turǵyndardyń aryz-shaǵymdary kóp túsetin salalardyń biri. Qoǵamdyq kólikti arnaıy tekserý barysynda (43 avtobýs qamtylǵan) qyzmet kórsetý, jolaýshylarmen qarym-qatynas, sanıtarlyq jaǵdaı, jol júrý erejesin buzý, baǵdarlardyń qozǵalysy arasyndaǵy ınterval jáne t.b. baǵyttarda júrgizýshiler men kondýktorlar tarapynan birqatar buzýshylyqtar anyqtaldy. Tıisti qyzmetterge elorda turǵyndarynyń syn-eskertpelerin eskere otyryp, kemshilikterdi joıý tapsyryldy. Jolaýshylar tasymaly astanalyq qyzmet kórsetýdiń joǵary talaptaryna saı bolýy tıis. Astana ákimi sonymen qatar, astananyń ınvestıtsııalyq tartymdylyǵyn damytý men bızneske qoldaý kórsetýge múddeli uıym retinde eń aldymen Investorlarǵa qoldaý kórsetý ortalyǵynyń jumysyn kúsheıtýge nazar aýdardy. Qala Astanaǵa ınvestıtsııa tartý úshin barlyq jaǵdaıdy jasaýda. Ákimdiktiń qyzmet kórsetý úderisterin ońtaılandyrýy jáne ákimshilik kedergilerdi azaıtý - bul jumystaǵy mańyzdy baǵyttardyń biri bolyp tabylady, dep habarlaıdy astana.kz. Sonymen qatar keńeste qalalyqtardyń qysqy merekelerge daıyndyǵy men qysqy demalysyn uıymdastyrý máseleleri de qozǵaldy. Qysqy Astana muz qalashyqtary, jappaı konkı tebý, jeltoqsandaǵy merekelerge arnalǵan mádenı-kópshilik is-sharalar sııaqty alýan túrli baǵdarlamalar daıyndaýda.
