Á.Jaqsybekov pen A.Vınokýrov «Astana-dýatlon 2015» jarysyna qatysty (FOTO)
Jarysqa shamamen 300 adam qatysyp, olardyń qataryna elorda ákimi Ádilbek Jaqsybekov pen Olımpıada chempıony Aleksandr Vınokýrov qosyldy. Sportshylar 15 shaqyrymdyq ara qashyqtyqty velosıpedpen ótip, odan keıin 5 shaqyrymǵa júgirdi. Árbir qatysýshynyń ýaqyttary tirkeý barysynda arnaıy berilgen jeke sıptiń kómegimen eseptelindi.
Sonymen jarystyń bas júldesi qos saıystyń nátıjesinde 40 mınýt 10 sekýndty kórsetken 1996 jyly dúnıege kelgen ıÝrıı Şerbınınge buıyrdy. Oǵan fıtnes klýbqa 1 jyl tegin barýǵa abonement pen velosıped syıǵa tartyldy.
«Munyń barlyǵy da eń aldymen sizderdiń densaýlyqtaryńyz úshin jasalýda. Sportymyzdy damytý maqsatynda bizdiń memleketimiz júzege asyryp jatqan sharalar men Prezıdentimiz atqaryp jatqan isteri búginde óz jemisin berýde. Astana sporttyń, salaýatty ómir saltynyń úlgisine aınalyp otyr. Astana velokomandasy men onyń menedjeri Aleksandr Vınokýrov ózderiniń jetistikterimen Qazaqstannyń jáne elordanyń atyn álemge tanytýda», - dedi Á.Jaqsybekov.