Á.Jaqsybekov nóser jaýynǵa baılanysty barlyq tehnıkany jumyldyryp, kúndelikti kezekshilik uıymdastyrýdy tapsyrdy
ASTANA. QazAqparat - Búgin Astana qalasynyń ákimi Ádilbek Jaqsybekovtiń basshylyǵymen ótken kezekti apparattyq jıynda demalys kúnderi tolassyz jaýǵan nóser saldaryn joıý máseleleri men elordadaǵy sanıtarlyq-epıdemıologııalyq jaǵdaı talqylandy, dep habarlaıdy Astana qalasy ákiminiń baspasóz qyzmetinen.
Jaýyn-shashyn saldarynan 16-17 mamyr kúnderi elordanyń 12 ýchaskesin sý basyp, kólik qozǵalysy shekteldi. «Qazgıdromet» málimetteri boıynsha jaýyn-shashynnyń aılyq mólsheri 34 mm bolsa, sol kúni bir táýlik ishinde 38,5 mm jaýyn-shashyn jaýǵan. Sınoptıkterdiń habarlaýynsha, elordada aldaǵy kúnderde de kóshpeli bult shyǵyp, jańbyr jaýady dep kútilýde.
«Demalys kúnderi jaýǵan jaýyn-shashyn jalpy normadan aýytqyǵan qubylys. Jaýǵan jańbyr mólsheri qalypty mólsherden asyp ketti. Sınoptıkterdiń boljaýynsha, mundaı jaǵdaı aldaǵy ýaqytta da qaıtalanýy múmkin. Sondyqtan bul kúnderi barlyq tehnıkany jumyldyryp, kúndelikti kezekshilik uıymdastyrý qajet. Sý sorýǵa arnalǵan qurylǵylar sý basý qaýpi bar jerlerde ornatylýy kerek», - dedi ákim.
Qalanyń kommýnaldyq qyzmetteri kúsheıtilgen rejimde jumys atqarýda. Astanada demalys kúnderi 10 myń tekshe metr jańbyr sýy soryldy.
