Á. Jaqsybekov: Memleket basshysynyń barlyq tapsyrmalary merziminde oryndalýy tıis

ASTANA. QazAqparat - Astana qalasynyń ákimi Ádilbek Jaqsybekovtiń tóraǵalyǵymen ótken elorda ákimdiginiń apparat otyrysynda sáýir aıynda ótken elordany damytý jónindegi otyrysta Memleket basshysy bergen tapsyrmalardy oryndaý boıynsha atqarý tártibi qaraldy, dep habarlady qala ákiminiń resmı saıty.

Qala basshysy memlekettik organdardyń basshylarynan tapsyrmalardy oryndaý boıynsha bekitilgen is-sharalar josparynyń barlyq tarmaqtaryn qatań oryndaýdy talap etti.

Otyrys barysynda qaralǵan máselelerdiń biri qala boıynsha ıgerilmegen jer ýchaskelerine qatysty boldy. Ákimniń aıtýynsha, árbir ıgerilmegen jer ýchaskesi boıynsha taldaý júrgizilip, tıisti jaýap berý sharalary qabyldanýy kerek. Qala basshysy orynbasarlary S. Horoshýn men A. Lýkınge osyndaı ýchaskelerdi óz baqylaýyna alýdy tapsyrdy.

Sonymen qatar, otyrys barysynda elordada ruqsat etilmegen jarnamalardy ornalastyrý máseleleri qaraldy. Á. Jaqsybekov bul máseleni ótken jyly da birneshe ret kóterip, syrtqy jarnamanyń júıesizdigi men retsizdigine nazar aýdarǵan bolatyn. Bul qalanyń sáýlettik kelbetin buzyp, «Tilder týraly» zańdy buzýǵa ákeledi. Osyǵan baılanysty sáýlet, tilderdi damytý basqarmalary, aýdandyq ákimdikter jáne jergilikti polıtsııa qyzmeti qalanyń syrt kelbeti elordanyń mártebesine sáıkes bolýy úshin birlesken jumystar júrgizýge tıis.