Á.Jaqsybekov: Qurylys alańdaryndaǵy máselelerdi qurylys kompanııalary sheshýi kerek
ASTANA. QazAqparat - Búgin Astana ákimdiginde ótken kezekti apparat jıynynda elordada ótetin EKSPO-2017 halyqaralyq mamandandyrylǵan kórmesine daıyndyq máseleleri talqylandy. Atap aıtqanda, qala ınfraqurylymynyń tıisti jol belgilerimen qamtamasyz etilýi qarastyryldy, dep habarlaıdy elorda ákimdiginiń baspasóz qyzmetinen.
Búginde elorda joldarynda 24 myń mekenjaı taqtalarynyń 753-i ǵana úsh tilde kórsetilgen. Aýdandarǵa bul jumysty jedeldetý, sondaı-aq qala boıynsha aqparattyq taqtalar men jol júrý baǵytyn kórsetetin belgilerdi ornatý tapsyryldy. Elordanyń týrıstik tartymdylyǵyn eskere otyryp, sývenırlik jáne ımıdjdik ónimderdiń shyǵarylýy artady. Degenmen, bul sala aıtarlyqtaı damymaǵan. Elorda ákiminiń aıtýynsha, sývenırlik ónimderdi shyǵaratyn kompanııalarmen jumysty rettep, Astana brendi men EKSPO belgisin taýarlarda kórsetýge nazar aýdarý qajet. Búgingi tańda qurylys salasyndaǵy eńbek sharttary ózekti máselelerdiń biri bolyp tabylady. Qurylys nysandarynyń kóbi qosalqy merdigerlik mekemelerdiń kúshimen salynatyndyqtan, qurylys alańdarynda joǵary jáne orta biliktiligi bar jumyskerler sany úshten bir bóligin de quramaıdy. Kóbi qurylys alańdarynda ǵana tájirıbe jınaqtaı bastaıdy. Sonyń saldarynan qaıǵyly oqıǵalar oryn alyp, atqarylǵan jumys sapasy tómen bolady, sondaı-aq áleýmettik qarbalastyq pen túrli shıelenister kóp kezdesedi. «Bul máselemen aınalysý qajet. Qurylys kompanııalarynyń basshylary óndiristik jaraqattaný men jumys barysyndaǵy shıelenisterdi sheshýi kerek. Kásipkerler palatasynyń aıasyna qaladaǵy barlyq qurylys mekemelerin jınap, búginde memlekettik bılik organdaryn jáne eńbek ujymyn tolǵandyratyn máselelerdi kóterý kerek», - degen elorda basshysy osy saladaǵy olqylyqtardy joıý boıynsha Kásipkerler palatasy men qala ákimdiginiń arasynda memorandýmǵa qol qoıýǵa usynys jasady. Qalanyń sanıtarlyq jaǵdaıy da nazardan tys qalmady. Apparat jınalysynda aıtylǵandaı, jasalǵan eskertýlerge qatysty tıisti sharalar ýaqytyly oryndalmaıdy, keıbir basqarmalar kelip túsken ótinishtermen múldem aınalyspaıdy. Basqarma basshylaryna osy máselege jaýapkershilikpen qaraý tapsyryldy. Sondaı-aq jıynda azyq-túlik baǵasyn turaqtandyrý maqsatynda ótkiziletin aýylsharýashylyq jármeńkelerine taǵy da oń baǵa berildi. Osyǵan oraı áleýmettik az qamtylǵan turǵyndar sanatyna kómek kórsetý jáne qalanyń jeke bólikterinde kommýnaldyq saýda oryndaryn ashý máselelerin qarastyrý kózdeldi. Sonymen qatar Astanada múgedekterdi jumysqa ornalastyrý máselesi talqylanyp, tıisti tapsyrmalar berildi.
