Á. Jaqsybekov: kim-kimdi jáne ne úshin dollarǵa múddeli etedi
ASTANA. QazAqparat - Búgin Astana qalasy ákimdiginiń kezekti apparat jınalysynda qala ómirindegi birqatar mańyzdy máseleler qarastyryldy.
Atap aıtqanda, «Tulpar» saýda ortalyǵyndaǵy jalǵa beriletin oryndardyń aı saıynǵy tóleminiń qymbattaýy talqylandy.
Jaqynda atalmysh saýda ortalyǵynyń jalǵa alýshylary basshylyqtyń aı saıynǵy tólenetin tólemaqynyń dollar kýrsynyń ósýine baılanysty kóbeıtip otyratynyn aıtyp, óz narazylyqtaryn bildirgen bolatyn. Atap ótý kerek, mundaı jaǵdaı qalanyń basqa saýda ortalyqtarynda da oryn alǵan.
Elorda ákimi jalǵa alýshylarǵa nıettestik bildirdi. - Dollarǵa múddeli bolýdyń buǵan qandaı qatysy bar? Jalǵa beriletin oryndardyń tólemaqysyna dollar kýrsy qalaısha áser etedi? Jalǵa alýshylar saýdadan túsken aqshany tek qana teńgemen alady, al, tólemaqyny dollarmen tóleýge mindetti. Osynyń barlyǵy baǵa saıasatynyń turaqsyzdyǵyna ákelip soǵady, - dedi Á. Jaqsybekov jáne arnaıy jumys tobyna osy máseleniń sheshimin taýyp, qajetti túsindirme jumystaryn ótkizýdi tapsyrdy.
Elorda basshysy qalanyń jol jıekterindegi aqyly turaqtardyń jetkilikti bolýyn uıymdastyrýdy tapsyrdy, bul óz kezeginde qaladaǵy jol qozǵalysy trafıgine oń áserin tıgizýi qajet. Bul úshin sheteldikterdiń aldyńǵy qatarly tájirıbesin zerttep, ishki aýmaqtar, mektep aınalasy, JOO jáne basqa da áleýmettik nysandar trafıgine kóńil bólý shart.
Shaǵyn jáne orta bıznes damýynyń kóptegen máseleleri, sonymen qatar, avtoturaqtardyń qurylysy áli tolyqtaı bir retke qoıylmaǵan jer telimderin aýktsıonǵa shyǵarý mehanızmine kelip tireledi. Á. Jaqsybekov aǵymdaǵy erejelerge tıisti ózgerister engizýdi tapsyrdy, olardy jeńilirek, túsinikti ári anyq, jáne eń bastysy - búgingi kúnge, jańa ekonomıkalyq saıasatqa sáıkes qylyp jasaýdy tapsyrdy.
Ákim, sondaı-aq, memlekettik baǵdarlama aıasynda salynǵan turǵyn úılerdiń jaǵdaılaryna erekshe toqtalyp ótti. Bul jerde túıtkildi máseleler kóp. Keıbir salýshylar qosalqy transformatorlyq beketterdi, qazandyqtardy jáne basqa da qosalqy nysandardy ýaqytynda qala balansyna bermeıdi. Bul óz kezeginde páterdi satyp alý men kútý baǵasyna tikeleı áserin tıgizedi. Úı aýmaqtarynyń abattandyrylýy men úı asty oryndarynyń basqa maqsattarda qoldanylýy turǵyndardyń aryz-shaǵymdaryn týǵyzýda. Á. Jaqsybekov atalmysh nysandardy aralaý barysynda birqatar eskertpelerdi aıtyp, tez arada bul kemshilikterdiń ornyn toltyrýdy tapsyrdy, dep habarlaıdy 24.kz.
