Á.Jaqsybekov ІІD qyzmetkerlerinen jol jıegine toqtaǵan júrgizýshilerge túsinistik tanytýyn surady
ASTANA. QazAqparat - Búgin Astana qalasynyń ákimdiginde qala basshysy Ádilbek Jaqsybekovtiń tóraǵalyǵymen apparattyq keńes ótti. Keńes barysynda ákim qaladaǵy aǵymdaǵy jaǵdaı boıynsha esepti tyńdap, birqatar áleýmettik máselelerge toqtaldy, dep jazady ákimdiktiń resmı saıty.
Qala basshysy otyrys barysynda avtoturaqtar máselesin de kóterdi. Jaqynda jańa «Jol qozǵalysy týraly» QR Zańy qabyldanǵan bolatyn. Oǵan sáıkes kólikti jol boıynda qaldyrýǵa tyıym salynǵan, tipti bul áreket úshin 100 myń teńge aıyppul taǵaıyndalǵan. Alaıda qala basshysy búginde elordada avtoturaqtar men kólik qoıatyn arnaýly oryndardyń jetispeýshiligine baılanysty ІІD qyzmetkerlerinen osyndaı jaǵdaılardy nazarǵa alýdy tapsyrdy.
Budan basqa, ákim Prezıdenttiń jaıaý júrginshilerge arnalǵan jer asty jáne jer ústi ótkelderin salý jónindegi tapsyrmasyn oryndaý qajettigine toqtaldy. Bul da jol qaýipsizdigine, keptelisterdiń azaıýyna oń áserin tıgizbek.
Aıta keteıik, buǵan deıin QR Іshki ister mınıstrligi Ákimshilik polıtsııa komıtetiniń tóraǵasy Igor Lepeha: «Turaqtar tetigi rettelmeıinshe júrgizýshilerge jol jıekterine toqtaı berýge tyıym salynbaıdy», - degen bolatyn.
