Á. Jaqsybekov Gennadıı Golovkınge kezekti jekpe-jegin Astanada ótkizýdi usyndy
ASTANA. QazAqparat - Búgin Astana ákimdiginde qala basshysy Ádilbek Jaqsybekov tanymal qazaqstandyq kásipqoı boksshy, WBA nusqasy boıynsha álemniń sýperchempıony Gennadıı Golovkınmen kezdesti, dep habarlaıdy elorda ákimdiginiń resmı saıtynan.
Kezdesý dostyq atmosferada ótti. Ádilbek Jaqsybekov boksshyǵa tabys tilep, onyń elimizde sportty dáripteýge qosqan úlesin erekshe atap ótti.
Elorda basshysy Gennadıı Golovkınniń jeńisterimen halyqaralyq arenada respýblıkamyzdyń jáne astanamyzdyń ımıdjin shetelderde nyǵaıtyp júrgenin, sondaı-aq, óskeleń urpaqqa úlgi bolyp tabylatynyn aıtty.
«Biz Astana qalasynda kelesi jyly jekpe-jek ótkizýdi talqyladyq. Bul bastama qoldaý tabatynyna senemin, barlyq qala turǵyndary úshin bul úlken syı bolady. Kezekti ret elordaǵa kelip, qalanyń qarqyndy damýyna kýáger bolý óte qýanyshty sát», - dedi Gennadıı Golovkın.
Kezdesý barysynda Astana ákimi sportshyny fýtboldan 22 qarashada «Astana Arena» stadıonynda ótetin bıylǵy Qazaqstan Respýblıkasy kýbogynyń aqtyq jarysyn kórýge shaqyrdy.
Gennadıı Golovkın - 2003 jylǵy álem chempıony, jáne 2004 jylǵy Olımpıada oıyndarynyń kúmis júldegeri. WBA nusqasy boıynsha álemniń sýperchempıony. Kásipqoı boksta 31 kezdesý ótkizip, barlyǵynda jeńiske jetken, sonyń ishinde 28-in nokaýtpen aıaqtady. Sportshy álemdik deńgeıde tamasha boks kórsetip, tórtkúl dúnıedegi jankúıerlerin qýantyp júr. Álemniń jetekshi BAQ-tary, Golovkındi óz salmaǵynda planetamyzdyń eń myqty boksshysy dep sanaıdy.
Sporttyq jetistikterinen basqa G.Golovkın «Qurmet» jáne «Parasat» ordenderimen, sondaı-aq, «Eren eńbegi úshin» medalimen marapattalǵan.
Golovkın sońǵy kezdesýin 2014 jylǵy 18 qarashada meksıkalyq Marko Antonıo Rýbıomen ótkizgen. Otandasymyz 2-shi raýndta qarsylasyn nokaýtqa jiberip, jeńiske jetken bolatyn.
Golovkınniń kelesi jekpe-jegi 2015 jylǵy 21 aqpanda ótedi. Sportshy Martın Mıýrreımen (Ulybrıtanııa) kúsh synasady.
