Á. Jaqsybekov elordanyń Biryńǵaı ıntellektýaldy baılanys ortalyǵyn iske qosýdy tapsyrdy
ASTANA. QazAqparat - Búgin Astana ákimi Ádilbek Jaqsybekovtiń tóraǵalyǵymen ótken kezekti apparat jınalysynda birqatar ózekti máseleler talqylandy. Olardyń qatarynda - qalanyń barlyq kommýnaldyq qyzmetterin qys maýsymyna daıarlaý, sondaı-aq, elordanyń ekologııalyq ahýaly,dep habarlaıdy elorda ákimdiginiń baspasóz qyzmetinen.
Eske sala keteıik, ótken aptada qala basshysy kommýnaldyq qyzmetterdiń, atap aıtqanda, qar tazalaıtyn jáne ózge de tehnıkanyń qys maýsymyna daıyndyǵyn teksergen bolatyn. Ákim qar jaýǵan sátten bastap maýsym boıy tazalaý jumystary úzilissiz júrgizilýi kerektigin atap aıtty.
Apparat otyrysy barysynda qalanyń ekologııalyq ahýaly da talqylandy.
Qalada kesek otynmen jylynatyn úıler men ǵımarattar sany 32 myńǵa jýyq. Budan bólek, aýany turǵyn úı sektory jáne jylytý keshenderinen ózge, avtokólikter de aıtarlyqtaı lastaıdy. Búginde elordada tirkelgen avtokólikterdiń sany 320 myńnan asty. Odan bólek, kúndelikti qalaǵa 60-70 myń ózge qalalardan keletin kólikter bar.
Á. Jaqsybekov elordanyń Biryńǵaı ıntellektýaldy baılanys-ortalyǵyn iske qosý máselesine de erekshe nazar aýdardy. Qazirgi ýaqytta ákimniń tapsyrmasyna sáıkes qaladaǵy barlyq qyzmetterdi bir júıege toǵystyratyn atalǵan baılanys ortalyǵyn iske qosý boıynsha jumystar júrgizilýde. Ortalyq «bir qońyraý» prıntsıpi boıynsha jumys isteıtin bolady. Biryńǵaı ortalyqqa qalanyń árbir turǵyny ózin alańdatqan kez-kelgen másele boıynsha habarlasyp, keń kólemde tolyqqandy aqparat alýǵa múmkindigi bolady.
Baılanys ortalyǵynyń baǵdarlamalyq jabdyqtalýy turǵyndardyń shaǵymdaryn jan-jaqty taldaýǵa múmkindik beredi. Nátıjeler men statıstıkalyq málimetter «Basshy panelinde» kórsetilip turady.
Á. Jaqsybekov atalmysh joba qala úshin óte qajet ekenin jáne onyń bolashaqta qaladaǵy barlyq qyzmetterdi baqylaý men baǵalaý quralyna aınalatynyn aıtty.
Ákim Biryńǵaı ıntellektýaldy baılanys-ortalyǵyn 15 qarashada pılotty túrde iske qosýdy, al 1 qańtardan bastap qala turǵyndaryna tolyqqandy qyzmet kórsetýin bastaýdy tapsyrdy. Osylaısha, Astana «aqyldy qala» týraly pikirdiń ornyǵýyn damytyp, bekite túsýi kerek.
