Á.Jaqsybekov elordany «aqyldy» qalalar reıtınginde aldyńǵy orynǵa shyǵarmaq
ASTANA. QazAqparat - Astana álemniń ıntellektýaldy, ınnovatsııalyq qalalarynyń birine aınalady. Bul týraly búgin «Smart Astana - 2014» halyqaralyq konferentsııasynda elorda ákimi Ádilbek Jaqsybekov aıtty.
«Memleket basshysy Nursultan Ábishuly Nazarbaev Astana qalasyn barlyq álemdik standartqa jaýap beretin aqyldy qala retinde salyp, jetildirýdi tapsyrdy. Maǵan Bıll Hatchıson myrza (i-Canada qaýymdastyǵynyń basshysy) Toronto qalasynyń reıtıngte birinshi ekendigin aıtty, al Astana 21-shi orynda. Bizderdiń aýa raıymyzdyń ózi uqsas ekendigin eskere otyryp, bizdiń mindetimiz - 1-2 oryndardy Torontomen bólisý. Biz ony júzege asyratyndyǵymyzǵa úmit artamyn», - dedi qala basshysy.
Á.Jaqsybekov óz sózinde elordanyń álemniń ıntellektýaldy, ınnovatsııalyq qalalarynyń birine aınalatyndyǵyna senim bildirdi. Sonymen qatar álemdik barlyq standarttarǵa saı kelý úshin qalada barlyq sharalar qolǵa alynyp, qajetti resýstar paıdalanylatyndyǵyn atap ótti.
«Barlyq protsessor ınnovatsııalyq bolady, al engiziletin tehnologııalar júıesi halyqtyń barlyq sanatyna qol jetimdi jasalady. Bul úshin biz 2 mańyzdy jobany júzege asyrýǵa kiristik. Birinshisi Zııatker kólik júıesi jobasy, ol qalanyń 6 kóshesine engizilgen», - dedi ol.
Elorda ákiminiń aıtýynsha, ekinshi joba qaýipsiz qala dep atalady. Osy jobanyń arqasynda elorda kósheleri myńnan astam beıne kameralarmen, ondaǵan «aqyldy» baǵdarshamdarmen jabdyqtalǵan.
