Á.Jaqsybekov elordalyq 132 túlekke «Altyn belgi» tósbelgilerin tabys etti (FOTO)
ASTANA. QazAqparat - Búgin Astana ákimi Ádilbek Jaqsybekov Ulttyq biryńǵaı testileýdiń qorytyndysy boıynsha óz bilimin rastaǵan 132 elordalyq túlekke «Altyn belgi» tósbelgilerin tabys etti.
«Búgin bárińiz úshin erekshe kún. Mektep qabyrǵasynda ótken jyldardy artqa tastap, úlken ómirge aıaq basyp otyrsyzdar. Osy qýanyshty kúnmen barlyǵyńyzdy quttyqtaımyn. Elbasy Nursultan Ábishuly Nazarbaevtyń qamqorlyǵynyń arqasynda jas urpaqqa sapaly bilim, jaqsy tárbıe alý úshin barlyq jaǵdaı jasalǵan. Sebebi elimizdiń bolashaǵy sizderdiń qoldaryńyzda. Keleshekte memleketimizdi, Astanamyzdy odan ary kórkeıtýge óz úlesterińizdi qosasyzdar dep senemin. Sizderge sapaly bilim jáne tárbıe bergen ustazdarǵa rızashylyǵymdy bildiremin", - dedi túlekterdi quttyqtaǵan qala basshysy.
Ákimniń atap ótýinshe, bıyl elordada 4695 túlek attestat alǵan. Sonymen birge olardyń qazirgi kezdegi basty mindetteri ómirlik jolda tirek, senimdi serik bolatyn kásipti anyqtaý ekendigin de aıtty.
«Joǵary oqý oryndarynyń esikteri sizder úshin ashyq. Bilim berý granttary ulǵaıtylyp, shákirtaqy mólsheri ulǵaıtyldy. Álemdik deńgeıdegi «Nazarbaev Ýnıversıteti» quryldy. Sizder oqýdy jalǵastyryp, udaıy bilim alyp, jańa mashyqtardy ıgerý arqyly kúndelikti ómirde bilim men tehnologııalardy elimizdiń ıgiligi úshin tıimdi paıdalanýlaryńyz qajet», - dedi Á.Jaqsybekov.
