Á. Jaqsybekov elordadaǵy jumyssyzdyqty tolyqtaı joıýdy tapsyrdy

ASTANA. QazAqparat - Búgin Astana qalasynyń ákimi Ádilbek Jaqsybekov kezekti apparattyq jınalys ótkizdi. Jınalystyń basty taqyryby - Memleket basshysynyń ótken aptada Úkimettiń keńeıtilgen otyrysy kezinde aıtqan birqatar tapsyrmalaryn oryndaý, sonymen qatar, kommýnaldyq qyzmet, kólik júıesi men densaýlyq saqtaý mekemeleriniń jumystary.

Jıyn basynda Á. Jaqsybekov elordanyń qarqyndy damýy úshin Memleket basshysynyń qoıǵan talaptary men tapsyrmalaryn oryndaýdyń mańyzdylyǵyn atap ótti.

- Aldymyzda turǵan basty talap - ol elordanyń ekonomıkalyq ósimin saqtap qalý jáne turǵyndardy áleýmettik jaǵynan qoldaýdy kúsheıtý. Sondyqtan bıýdjettik qarjyny tıimdi paıdalaný jáne memlekettik organdardyń nátıjeli jumys jasaýy úshin bıýdjetti ońtaılandyrý boıynsha tez arada usynystar engizýdi tapsyramyn. Bul arada jumys istep jatqan jobalardy ıgerý isine basymdylyq berilýi kerek, - dedi qala ákimi.

Apparattyq jınalysta basa mán berilgen másele - jumyssyzdyqty joıý. Á. Jaqsybekov barlyq qalalyq qyzmet túrlerine, elimizde eń tómengi kórsetkishterge ıe bolyp otyrǵan elordadaǵy jumyssyzdyqty tez arada joıýǵa tapsyrma berdi. Ol úshin qala basshysy Astana qalasynyń Jumyspen qamtý jáne áleýmettik baǵdarlamalar basqarmasyna arnaıy joba ázirlep, buqaralyq aqparat quraldarymen tyǵyz qarym-qatynas ornatýdy tapsyrdy.

Qalalyq basqarmalardyń jumys deńgeıin aıta kele, Á. Jaqsybekov elordanyń kólik logıstıkasynda júıeli jumystardyń joqtyǵyn, qala turǵyndaryn aqparattandyrý isiniń sapasyzdyǵyn synǵa aldy. Máselen, qoǵamdyq kólikterdiń jol aqysynyń qalaı qalyptasatyny jaıynda múldem aıtylmaıtyny atalyp ótildi.

Sý tasqynyna qarsy is-sharalar men qalany qardan tazalaý jumystary da sóz boldy.

- Kóktemgi sý tasqynyna qarsy is-sharalar belgilengen ýaqyt boıynsha júrgizilip jatqanyna qaramastan, jeke sektor aýmaǵynan qardy shyǵarýǵa bar kúshti jumsaý kerek. Ásirese jylda sý basý qaýpi tónetin aýdandardy, aýlalardy tazartýǵa kóp kóńil bólý qajet. Indýstrıaldy park pen JEO-2 aýmaqtarynda sýdyń qaýipsiz erip, aǵýyn qamtamasyz etý úshin Esil, Aqbulaq, Sarybulaq ózenderiniń arnalaryn tazalaý kerek, - dedi elorda ákimi.

Jıyn sońynda aýdandyq ákimdikterge shaǵyn jáne orta kásipkerlik sýbektileriniń dámhana, shashtaraz, dúken aýmaqtaryn sanıtarlyq tazalaý jumystaryn muqııat qadaǵalaý tapsyryldy.

Densaýlyq saqtaý basqarmasyna turǵyndarǵa medıtsınalyq qyzmet kórsetýdiń sapasyn arttyrý boıynsha jumystardy júrgizý tapsyryldy.