Á.Jaqsybekov: Elordada sý tasqynynyń aldyn alý erekshe nazarda bolýy kerek
ASTANA. QazAqparat - Búgin elorda ákimdiginde Astana qalasynyń ákimi Ádilbek Jaqsybekovtiń tóraǵalyǵymen Tótenshe jaǵdaılardyń aldyn alý jáne olardy joıý jónindegi komıssııanyń otyrysy ótti.
Basqosýda komıssııanyń 2014 jylǵy jumys qorytyndysy qaralyp, aǵymdaǵy jyly sý tasqynyna qarsy sharalardyń negizgi josparyn oryndaý máselesi sóz boldy. Keńeske komıssııa músheleri, aýdan ákimderi, ákimdiktiń qurylymdyq mekemeleri, vedomstvolary, uıymdar men kásiporyndardyń basshylary qatysty, dep habarlaıdy Astana qalasy ákiminiń baspasóz qyzmetinen.
Keńeste sóz alǵan ákim kóktemgi mezgilde sý basýdyń aldyn alý qalalyq qyzmetter men vedomstvo basshylarynyń erekshe nazarynda bolý kerektigin eske saldy. Aǵymdaǵy jyldyń birinshi toqsanynda komıssııanyń aldynda turǵan negizi mindetter - sý tasqynynyń aldyn alýǵa baǵyttalǵan sharalar keshenin úılestirý jáne baqylaý. Bul rette Tótenshe jaǵdaılar departamentinde qalalyq jáne aýdandyq komıssııalar bekitilgen kestege sáıkes qala aýmaǵynan qardyń shyǵarylýyn, tıisti vedomstvolardyń tótenshe jaǵdaılardyń saldaryn joıý máselesin, materıaldyq-tehnıkalyq quraldar qoryn qurýdy baqylaýǵa aldy. Jıyn barysynda sý tasqynyna qarsy sharalar týraly aýdan ákimderi sóz aldy. Máselen, búginnen bastap barlyq aýdandarda shtabtar jumysy bastalyp, tıisti sharalar kesheniniń jospary jasaldy. 1-naýryzdan bastap sý tasqynynyń aldyn alý komıssııasynyń dıspetcherlik telefony jumys isteıdi. Keńeske qatysýshylar «Qazgıdromet» RMK-nyń kóktemgi sý tasqynyna baılanysty meteorologııalyq jáne gıdrologııalyq boljamdaryn tyńdady. Keńes qorytyndysy boıynsha qala basshysy sý tasqynyna qarsy sharalar josparyn tıimdi júzege asyrýǵa qatysty tıisti vedomstvolarǵa birqatar tapsyrmalar berdi. Qala aýdandaryn sý baspas úshin ákim táýlik boıyna kezekshilik uıymdastyryp, sondaı-aq Tótenshe jaǵdaılar departamentimen sý basý qaýpi joǵary aýmaqtardyń ahýaldy kartasyn ázirleýdi tapsyrdy. - Barlyq deńgeıdegi basshylar sý tasqyny kezeńinde turǵyndardyń qaýipsizdigin qamtamasyz etip, zardabyn azaıtý úshin barlyq sharalar keshenin mindetti túrde júzege asyrýy qajet, - dedi ákim.
