Á. Jaqsybekov: Búgin - Astana ómirindegi tarıhı kún
ASTANA. QazAqparat - «Astana» - «Galatasaraı» fýtbol matchynyń qarsańynda elorda ákimi Á.Jaqsybekov jankúıerlerdi, barlyq qala turǵyndaryn súıikti quramany qoldaýǵa shaqyrdy, dep habarlaıdy astana.kz.
- Bul oıynnyń nátıjesi qandaı bolatynyna qaramastan, biz jeńiske jetip qoıǵanbyz, - dedi ákim. - El sporty tarıhynda tuńǵysh ret qazaqstandyq fýtbol klýby Eýropa chempıondar Lıgasyn - eń joǵary deńgeıdegi sporttyq týrnırdi qabyldaýda.
Bul bapkerler men oıynshylardyń ǵana jetistigi emes. Birinshi kezekte, bul - sporttyń damýyna jan-jaqty qoldaý kórsetip, sporttyq nysandardy kóbeıtip, Astanada úlken halyqaralyq sport saıystaryn ótkizýge muryndyq bolǵan Prezıdentimiz Nursultan Ábishuly Nazarbaevtyń eren eńbeginiń arqasy.
- Bul, sonymen qatar, sport, dene shynyqtyrý jáne salaýatty ómir salty ómirlik ustanymdaryna aınalǵan qurama jankúıerleriniń de eńbegi. Búgin «Astana Arena» stadıonynda ótetin sporttyq mereke barlyǵymyzdy odan ári jumyldyra túsýi kerek, - dedi Á. Jaqsybekov.
