Á.Jaqsybekov Astanadaǵy qoǵamdyq kólik qyzmetin bir aı ishinde jónge keltirýdi tapsyrdy
ASTANA. QazAqparat - Búgin Astana qalasynyń ákimi Ádilbek Jaqsybekov ótkizgen kezekti apparattyq jıynnyń kún tártibinde qalalyq ınfraqurylym máseleleri, sonyń ishinde qoǵamdyq kólikter men basqa da salalardyń jumystary talqylandy, dep habarlaıdy elorda ákimdiginiń baspasóz qyzmetinen.
Qala basshysy turǵyndardan «Vırtýaldy qabyldaý bólmesi» men «Halyqtyq baqylaý» aıdarlaryna kelip túsetin shaǵymdarǵa toqtaldy. Qoǵamdyq kólik jumysyndaǵy túıtkildi máseleler áli de ózekti. Astanalyqtar las avtobýstarǵa, aıaldamalarǵa toqtamaı, júrginshilerdi baǵdarsham mańyna nemese joldyń ortasynda tastap ketetin, qozǵalys kezinde jarys uıymdastyratyn júrgizýshilerge narazy.
- Men qoǵamdyq kólik jumysyn jónge keltirýdi birneshe ret tapsyrǵanmyn. Basym baǵyttardy belgiledik, jańa avtobýstar aldyq, júrgizýshiler men kondýktorlardy oqyp-úıretetin kýrstar júrgizilip jatyr. Tıisti nátıje kóretin ýaqyt kelgen sekildi. Alaıda turǵyndardyń shaǵymdaryna súıensek, jaǵdaı túbegeıli ózgermegen, - dedi qala ákimi. Elorda basshysy bir aıda qoǵamdyq kólik qyzmetin jónge keltirýdi tapsyrdy. Taǵy bir ózekti másele - keıbir saıabaqtar men skverlerdiń, sonymen qatar jaıaý júrginshilerge arnalǵan jolasty ótkelderiniń jaǵdaıynyń qanaǵattanarlyqsyz bolýy. Mysaly, Qabanbaı batyr dańǵyly arqyly ótetin «Ramstor» saýda úıiniń mańyndaǵy jolasty ótkeli qala turǵyndary men múgedekter úshin qaýipti, dep sanaıdy Á.Jaqsybekov. Elorda basshysy barlyq jerasty ótkelderin tekserip, retke keltirýdi tapsyrdy.
