Á. Jaqsybekov «Astana» velokomandasymen kezdesti
ASTANA. QazAqparat - Búgin Astana ákimi Ádilbek Jaqsybekov Qazaqstan velosport federatsııasynyń prezıdenti Darhan Qaletaev jáne «Astana» velokomandasynyń ókilderi - olımpıada chempıony, bas menedjer Aleksandr Vınokýrov, velosportshylar Fabıo Arý men Andreı Zeıtspen kezdesti, dep habarlady astana.gov.kz.
Elorda ákimi, birinshi kezekte, keshe, 4 qazanda ótken «Almaty Týry- 2015» halyqaralyq kásibı velojarysta qazaqstandyq Alekseı Lýtsenkonyń jeńisi men «Lombardııa týry» atty klassıkalyq ıtalıandyq velojarystaǵy Vınchentso Nıbalıdiń jeńisimen quttyqtady.
Á. Jaqsybekov jas ıtalıandyq veloshabandoz Fabıo Arýdy da erekshe atap ótti. Ol bıylǵy maýsymda ótken eki Grand Týrdyń qurmet tuǵyryna kóterile aldy, ıaǵnı, «Djıro d'Italııa» velojarysynyń qorytyndysy boıynsha ekinshi oryn jeńimpazy jáne ıspandyq «Výelta» Grand Týrynyń jeńimpazy atanǵan.
«Bul maýsym sizder úshin óte sátti boldy, sizderdi osy jeńisterińizben quttyqtaımyn. Biz sizderdi maqtan tutamyz. «Astana» velokomandasy elimizdiń velosportyn nasıhattaýmen qatar, Astana qalasynyń brendine de aınalýda», - dedi Á.Jaqsybekov.
Kezdesý barysynda balalar men jasóspirimder arasynda velosportty damytý máseleleri qarastyrylyp, elordada «Astana Cup» halyqaralyq velojarysy «Saryarqa» velotreginde ótkizý múmkindigi týraly da erekshe sóz qozǵaldy.
Fabıo Arý Astana qalasynyń ákimine velosportty qoldaǵany úshin alǵysyn bildirip, ıspandyq «Výelta» Grand Týr jeńimpazynyń qyzyl jeıdesin tabystady. Aleksandr Vınokýrov, óz kezeginde, Á.Jaqsybekovke «A. Vınokýrov: Olımpııskıı pýt» kitabyn syılady.
