Á.Jaqsybekov: Astana sportshylary elorda jylnamasyn jarqyn jeńisterimen tolyqtyrdy (FOTO)
ASTANA. QazAqparat - Búgin Astana ákimi Ádilbek Jaqsybekov 17-shi jazǵy Azııa oıyndary men 2014 jylǵy ózge de halyqaralyq jarystardyń jeńimpazdarymen jáne júldegerlerimen kezdesti, dep habarlaıdy elorda ákimdiginiń baspasóz qyzmetinen.
Ákim qalanyń atyn álemge asqaqtatyp júrgen sportshylarǵa barsha astanalyqtar atynan alǵys bildirdi.
Ádilbek Jaqsybekov elordadaǵy sporttyń bastaýynda Memleket basshynyń ózi turǵandyǵyn aıta kele, sporttyń barlyq túrleri boıynsha álemdik talaptarǵa saı keletin zamanaýı nysandardy salý isine erekshe mán berilgendigin jetkizdi. 2011 jylǵy Azııa oıyndary men ózge de halyqaralyq jarystardyń Astanada ótkizilgeni osyǵan dálel.
Astana ákimi paraolımpıadashylarǵa aıryqsha alǵysyn bildirdi.
- 12-shi Azııa paraoıyndarynda medaldar boıynsha absolıýtti rekord ornatqan elordalyq paraolımpıadashylarǵa jáne olardy daıyndaǵan adamdarǵa rızashylyq bildirgim keledi. Kóp jaǵdaıda bapkerlerdiń eńbegi elenbeıdi. Bul rette Vladımır Zagorodnıı, Berik Myrjyqpaev, Álııa Túsipbekova sekildi Qazaqstan Respýblıkasynyń eńbek sińirgen jattyqtyrýshylaryn atap ótkim keledi, - dedi ol.
Óz kezeginde kezdesýge qatysýshylar elorda ákimine qoldaý kórsetkeni úshin rızashylyqtaryn bildire otyryp, aldaǵy josparlarymen bólisti.
- Prezıdentimiz Nursultan Nazarbaevqa sportqa degen erekshe kóńili úshin alǵys aıtamyn. Astanada bul sala odan saıyn damı túsedi degenge senimim mol. Barlyq sportshylardyń jospary - aldaǵy Olımpıada oıyndary men álem chempıonattarynda jeńiske jetý, - dedi bokstan álem chempıony, 17 jazǵy Azııa oıyndarynyń jeńimpazy, eńbegi sińgen sport sheberi Danııar Eleýsinov.
Ádilbek Jaqsybekov sportshylarǵa alǵys hattaryn tapsyrdy. Elorda sportshylarynyń ótken jylǵy jetken jarqyn jeńisteriniń biri - «Astana» fýtbol klýbynyń Qazaqstan Respýblıkasy chempıonatyndaǵy jeńisi. Osy oraıda ákim klýb kapıtany Tanat Nóserbaevqa arnaıy syılyq tabystap, barsha sportshylarǵa jańa jeńister tiledi.
- Sizderge Astana jylnamasyn jarqyn bettermen tolyqtyrǵandaryńyzǵa jáne óskeleń urpaqqa jaqsy úlgi kórsetkenderińiz úshin alǵys aıtamyn, - dedi Ádilbek Jaqsybekov.
