Á.Jaqsybekov «Astana» fýtbol klýbyn jeńisimen quttyqtady
ASTANA. QazAqparat - Astana qalasynyń ákimi Ádilbek Jaqsybekov búgingi apparat jınalysyn «Astana» fýtbol klýbyn Qazaqstan premer-lıgasynda chempıondyqty ekinshi márte jeńip alýyna oraı quttyqtaýdan bastady.
«Astana» komandasy osymen ekinshi márte chempıon bolyp otyr. Klýbtyń sátti oıyn kórsetýi jastar arasynda úlken qyzyǵýshylyqqa ıe. Bul jetistikti ıdelogııalyq jumystar men patrıotızmdi tárbıeleýde paıdalaný qajet», - dep atap ótti Astana qalasynyń ákimi. Ákimniń aıtýynsha, fýtbol men hokkeı oıyndary jáne basqa da sporttyq sharalardyń kóbi qoǵamdyq mańyzdy oqıǵalar bolyp tabylady. Bul jastar arasyndaǵy qundylyqtardyń qalyptasýyna áser etedi. Sonymen qatar buqaralyq sportty damytý, ashyq alańdardy tolyq paıdalaný astanalyqtar úshin qoljetimdi bolýy tıis, dep habarlaıdy elorda ákimdiginiń baspasóz qyzmetinen. Eske salaıyq, elordalyq fýtbol klýbyn alda úsh mańyzdy oıyn kútip tur. Atap aıtqanda, 21 qarasha kúni «Astana Arena» stadıonynda ótetin Sýperkýbok fınalynda «Astana» fýtbol klýby «Qaırat» komandasymen kezdesedi. Sonymen qatar 25 qarashada Chempıondar Lıgasy toptyq kezeńi aıasynda óz alańynda portýgaldyq «Benfıka» tobyn qabyldaıdy. Al 8 jeltoqsanda Ystambulda atalmysh klýb túrkııalyq «Galatasaraı» klýbymen kezdesedi.
