Á.Jaqsybekov «Astana» fýtbol klýbyn quttyqtady (FOTO)
ASTANA. QazAqparat - Qazaqstandyq fýtbol tarıhynda alǵash ret "Astana" FK Chempıondar Lıgasynyń toptyq kezeńinde oınaıdy. Búgin tańerteń fýtbolshylar elordaǵa oraldy. Ortalyq alańda fýtbolshylardy ulyqtaý saltanatyna astanalyqtar men jankúıerler jınaldy.
Astana qalasynyń ákimi Ádilbek Jaqsybekov fýtbolshylardy jeńisterimen quttyqtady. - Sizder laıyqty oıyn úlgisin kórsettińizder. Keshe túnde barlyq elorda turǵyndary sizderdi qoldaý úshin alańǵa jınaldy. Sizder - Astananyń ǵana emes, kúlli Qazaqstannyń maqtanyshysyzdar! Memleket basshysy otandyq fýtboldyń damýyna kóp kóńil bóledi. Prezıdenttiń qoldaýy arqasynda el fýtbolshylary osyndaı jeńisterimen bizdi qýantýda, - dedi qala basshysy. Eske sala keteıik, «Astana» fýtbol klýby APOEL klýbyna qarsy Nıkosııada ótken qarymta matchta teń oınady. Qorytyndy esep 1:1, alaıda eki match qorytyndysy boıynsha «Astana» komandasy Chempıondar Lıgasynyń toptyq kezeńine shyqty. 3000-nan astam fýtbol jankúıerleri túnde «Qazmedıa ortalyǵy» aldynda jınalyp, úlken ekrandardan atalmysh oıyndy tamashalady. Búgin keshke Shveıtsarııanyń Non qalasynda ornalasqan ÝEFA-nyń shtab-páterinde Chempıondar Lıgasynyń toptyq kezeńiniń jerebe tartý rásimi ótkiziledi. Sonyń nátıjesinde otandyq komandanyń kelesi qarsylastary anyqtalady. Kórsetilim Astana ýaqyty boıynsha saǵat 21:45 ótedi, dep habarlaıdy elorda ákimdiginiń baspasóz qyzmetinen.
